Часть первая о вере

Вопрос. Что есть вера?
Ответ. Вера есть, якоже глаголет божественыи апостол Павел [евреом, глава 11]: уповаемым извещение, вещем невидимым обличение: или сице [Злат. евреом, гл. 11, Бес. 32]: вера есть крепкое и твердое разумение со дерзновением в сердце о Бозе, и о вещех спасеных, ихже невидимо сердцем видим и усты исповедуем, по реченному [рим., глава 10]: сердьцем убо веруется в правду, усты же исповедуется во спасение.

Вопрос. Много ли есть сложении веры?
Ответ. По исповеданию веры христианския на дву вселенских соборех, первом Никейском, и втором Константинопольском сложенному, дванадесять есть артикулов веры православно християнскиа [собор никейс. и кон.; Афан. в тол. веры].

Вопрос. Которыи есть первыи [артикул] сложения веры? Ответ. Верую во единаго Бога, Отца вседержителя, творца небу и земли, видимым же всем и невидимым.

Вопрос. Колико в себе сей артикул имать вещей? и чесому от него научаемся?
Ответ. Три [Афан. в слове против ариан; и во исповедании тоже]: первое, како имам веровати и исповедовати, яко Бог един есть в существе своем. в трех же составех якоже се, Отец, Сын, и Дух Святыи. три убо составы един же Бог, якоже Христос во евангелии учит [Мф 28]. шедше научите вся языки, крестяще их во имя Отца и Сына и Святаго Духа. к сему научает яко межи треми божествеными собствы, первою особою и началом конца не имущим, источником же и коренем, и виною есть Отец, Сыну рождением, и Духу Святому происхождением.

Вопрос. Чесо второму научает сей артикул?
Ответ. Научает, яко Бог един сыи присно, ни начала ни конца имея, благости своея ради творец есть всем видимым же и невидимым [Дамаск. книга 2 глава 2], яко же писание святое учит [Деяния глава 4]: Владыко Ты Боже сотворивыи небо и землю и море и вся яже в них. и инде [колас. глава 1]: яко Онем создана быша всяческая, яже на небеси и яже на земли, видимая и невидимая, аще престоли, аще господьствия, аще начала, аще власти, всяческая Тем и Онем создашася.

Вопрос. Чего третиаго сей артикул научает?
Ответ. Научает [Дамаск. книга 2 глава 2], яко все вещи сотвореныя, яже и последнейшия суть, сам Бог назирает и соблюдает силою своею, по реченному [псалом 144], очи всех на Тя уповают, и Ты даеши им пищю во благо время, отверзаеши Ты руку Твою, и насыщаеши всяко животно благоволения.

Вопрос. Чего имам боле научитися о Бозе от того сложения?
Ответ. Имаши познати, яко в Бозе два суть свойства, едино убо существа есть, еже убо обще имать быти всем трем составом, якоже Богу Отцу, и Сыну, тако и Святому Духу, егда един Бог в Троице глаголется. другое свойство есть составное, и не общее, но коемуждо составу особно. якоже Отцу Сына родити, и Духа Святаго испущати: Сыну убо рождену быти от Отца прежде всех век от существа Его, такоже и Духу Святому от Тогоже Отца исходити.

Вопрос. Кое разньство есть межу свойствы состав и существа?
Ответ. Свойство существа знаменует [Дамаск. книга 1, глава 9], единого Бога быти, единаго естества, и существа, славы же, и престола, и величества. свойство же паки составное знаменует во едином божестве трех лиц разделение и несмущение: яко единого состава, свойство другому составу придатися не может.

Вопрос. О сотворении паки како имам разумети?
Ответ. Всякое сотворение от Бога в своем естестве, совершенно и зело добре сотворено есть, по реченному [Быт 1]: и виде Бог вся елика сотвори, и се добра зело.

Вопрос. Что Господь Бог первое сотворил?
Ответ. По писанному Моисеом [Быт. глава 1]; в сотворении сего видимаго мира, первое небо и землю сотворил: на концы же всего иного сотворения, человека от земли, вдохнув в него дух животен, по образу своему и по подобию сотворил.

Вопрос.  Преже видимаго сего мира сотворил ли что Господь Бог?
Ответ. О сем научают святии отцы, святыя восточныя церкве [Злат. о проувед. достод. книга 1; Дамаск. книга 2 глава 12; Григор. Богос. в слове о неп.], яко преже сего видимаго мира, невидимии ангелове сотворени суть. человек же о дву существ составися, видимаго, и невидимаго. по видимому имать тело, а по невидимому имать душю.

Вопрос. Како имам разумети о ангелех?
Ответ. Ангелове суть дуси разумнии [Дамаск. книга 2 глава 3], самовластнии жители, небеснии слуги Господа Вседержителя, по реченному [псалом 103]: творяи ангелы своя духи, и слуги своя огнь палящь.

Вопрос. На много ли чинов делятся ангели?
Ответ. Девять есть чинов ангельских: престоли, херувими, серафими, начала, власти, силы, господьствия, архангели, и ангели.

Вопрос. Кая служения ангельская пред Богом?
Ответ. Первое [Дионис. о небесном священонач. глава 7], Первое, Господа Бога непрестанно славити и служити Ему, по воли и по повелению Его святому. потом людем избранным Божиим ко спасению ходатайми быти, по реченному [евреем глава 1] не вси ли суть служебнии дуси в служение посылаеми за хотящих наследовати спасение, такоже возвещают волю Божию, и благодейства Его чаловеком, якоже благовестил ангел Пресвятей Деве. и рожество Христово пастырем в полунощи возвестили [Лука 1 и 2].

Вопрос. Како имам разумети яко ангели служат нам?
Ответ. Защищают нас от неприятеля душевнаго, и от всякого зла. якоже писание святое учит [Деян. глава 5], ангел Господень нощию отверзе двери темници. изведе же их рече, идите, и ставше глаголите в церкви людем вся глаголы жизни сея. и на ином месте [глава 12]: и Петр быв в себе рече, ныне вем воистину яко посла Бог ангела своего и изят мя из руки Иродовы, и всего чаяния людей иудейских. молитвы же, и милостыни, и иная благочестивая дела наша пред престол Божии приносят, якоже писание святое свидетельствует [Товии 12]. когда молился еси с плачем, и погребал еси мертвыя, и оставльши обед свой, скрывал еси умершыя в день  в дому твоем. нощию же погребал еси я, аз принесох молитву Господу Богу.

Вопрос. Всякии ли человек имать ангела стража си?
Ответ. Всякии верныи имеет, по глаголющему во евангелии [Мф 18; Дамаск. книга 2 глава 3; Дионис. о небесном священонач. глава 9; Феофил. на Матф. глава 18; Злат. Бес. о непос.]: блюдите, да не презрите единаго от малых сих: глаголю бо вам, яко ангели их на небесех выну видят лице Отца Моего небеснаго. и не точию человеци имут, но и грады, страны, и царства. такоже и монастыри и церкви имут ангелов особных хранителей себе.

Вопрос. Како или чим ангелов хранителей себе получаем?
Ответ. Молитвою непрестанною, еже молити их о ходадайстве к Господу Богу, наипаче же ангела хранителя своего, дабы молитвы наши пред престол Божии принося, ходатайствовал о нас, и сам бы был помощником, на всякого врага, паче же на невидимаго.

Вопрос. Чим ангела хранителя от себе отгоняем?
Ответ. Грехами, наипаче же смертными [Злат. Матф. глава 4 бес. 5]: тем аще и случится кому от немощи человеческиа впасти в грех, наипаче же смертныи, не отлагати то, но вскоре исповеданием и покаянием очищати себе потреба, дабы ангел хранитель пакися к нам обратил, и не попущал врагу невидимому в болшия грехи нас вводити.

Вопрос. Ангели вси ли святи и блази?
Ответ. Ангели вси святи и блази от Господа Бога сотворени суть, но отступник с своими ему единомыслеными, волею своею отступи от Бога, и сотвори себе злым и лжею, по глаголющему Христом [Ин 18]: он человекоубиица бе искони, и во истине не стоит, яко несть истины в нем. егда глаголет лжю, от своих глаголет, яко ложь есть, и отец лжи. За что и с неба свержен бысть; и вместо ангела учини себе сатаною и прелестником человеческим.

Вопрос. Может ли диавол человека к греху приневолити?
Ответ. Диавол сыи, первыи враг человеку, всегда его искушает, и к греху приводит всякими образы по писанному [1 Пет. глава 5; Дамаск. книга глава 4]: трезвитеся бодрствуйте, зане сопостат ваш диявол яко лев рыкая ходит искии кого поглотити, но нудити не может.

Вопрос. Како имам разумети о человеце?
Ответ. Человек от Господа Бога сотворен есть [Вас. ст.], по образу Его и по подобию, якоже и преже о том научихом, преже греха бе в достойнстве безгрешия [в стане невинности], не ведая что злаго, егда же преступи заповедь Божию, тогда достоинство безгрешия в стан греха, и целость человека в немощь бысть.

Вопрос. Кое разньство есть межу достоинством, безгрешия и греха?
Ответ. Достоинство безгрешия [Дамаск. книга 2 глава 1], имать в себе по благодати безсмертие и нетление. достоинство греха, принесе с собою смерть же и тление по реченному, воньже убо день аще снесте от древа, смертию умрете.

Вопрос. В достоиньстве греха како человек бе?
Ответ. В смерти, и в тлении, и во всяких страстех, и в клятве, обаче не без надежи, егда к змии Господь Бог глаголал [Быт 3]: вражду убо положю посреде тебе, и посреде жены, и посреде семенем твоим, и посреде тоя. той тебе блюдет главу, и ты блюдеши ему пяту. и сия надежа и обещание Божие, даже до пришествия Мессии глаголаннаго, патриархи и пророки утешала человеческии род. егда же Мессиа желаемыи, рекше Iсус Христос прииде по обещанию, и род человеческии кровию своею от работы вражия искупи, клятву взем, безсмертие же в животе вечном даровал, якоже о том ниже научим.

Вопрос. Ведал ли Бог о Адаме яко имать согрешити?
Ответ. Не точию о Адаме, но и о диаволе и о всех сотворениах знал и ведал [Дамаск. книга 2 глава 4]: глаголю же о ангелех и о человецех, яже имут мыслити, глаголати, и творити: обаче сотвори се на обновление болшаго благодеяния своего. в человеце паки и се ведал, яко не токмо благодеяние Божие болшее искуплением Его имать показатися, но яко в естестве своем и в составе Сына Божия. и имать сести одесную престола Божия [евреем глава 1]: и ангели имут пред Ним покланятися, яко пред Господем своим: имже ни злоба диавольская ниже грех человеческии в мире к тому владети и пакоствовати можаше.

Вопрос. Всякое ли сотворение сам Бог надзирает?
Ответ. Аще о сем и выше поведася, яко вся весть Бог, обаче к тому да скажется и истиннее: вся убо весть Господь Бог, яко и малыя вещи в деснице своей имать, и оными заведает, якоже сам во евангелии учит [Матф. глава 10; Злат. о проуведении книга 1]: не две ли птице ценитеся единому ассарию, и не едина от нею падет на земли без Отца вашего, вам же и власи главнии вси изочтени суть.

Вопрос. Что же имея Господь Бог человека в дозоре своем, попусти ему в грех впасти?
Ответ. Время еже в раи назнаменованное было на искус человека, еже есть даною заповедию, еяже не содержав в себе, не сыи еще благодатию утвержен, но оставлен в воли своей, по реченному [Сир 15], в начале сотвори Бог человека, и остави его в руце изволения его, рек, аще хощеши, соблюдеши заповеди, и веру сотвориши благоволения. предложил ти есть огнь и воду, и на неже хощеши, простреши руку твоею. пред человеком живот и смерть. и еже аще изволит, дастся ему, но не отдав подобающаго послушания и веры, по попущению Божию впаде в грех преступления, на указание больших благодеянии Божиих.

Вопрос. Кии промысл Божии о человеце в достоиньстве греха?
Ответ. Яко николиже милостивыи Бог от промысла своего человека оставляет, но всегда ему дает вину ко благому [Дамаск. книга 3 глава 3. и книга 2 глава 9 и 27]: не отводя же его от самовластия се творя, но усердствуя помогает ему благодатию своею: благодать же глаголю и яже ныне даную благодать Iсус Христом.

Вопрос. Чего имам более научитися от того артикула?
Ответ. Яже любо лучшаго, и изряднейшаго умом своим обьяти можеши, то все Господу Богу, яко сущему благодателю написуй [Дамаск. книга 1 глава 12. Иаков пос. глава 1. Дион. о божествен. имен. глава 1]. о сотворении же паки разумевай, яко яже аще в себе благо имать, то все от Господа Бога. а яже аще злаго, то от себе: глаголю же от человек и ангел злых.

Вопрос. Которыи есть вторыи артикул веры?
Ответ. И во единаго Господа Iсуса Христа Сына Божия, единороднаго, от Отца рожденаго прежде всех век. света от света, Бога истинна, от Бога истинна, рожденна а несотворенна, единосущна Отцу, имже вся быша.

Вопрос. Многим ли вещем научает сей артикул?
Ответ. Двум [Афан. в симв.; Дамаск. книга 1 глава 6 и 9]: первое яко Слово превечное Iсус Христос от Бога Отца рожден, а не сотворен есть, и прежде век сыи вкупе со Отцем, единаго существа и естества, и единыя славы, престола же и величества. Бог истинныи, от Бога истиннаго, свет несотворен, от света несотворена.

Вопрос. Чесому научает другому сей артикул?
Ответ. Научает сему: яко тем словом превечным весь мир видимыи же и невидимыи сотворен есть, якоже писание святое учит [Ин 1]: в мире бе, и мир тем бысть, и мир Его не позна. и инде [евреем глава 1]: Егоже положи наследника всем, Имже и веки сотвори.

Вопрос. Та два имена Iсус Христос что знаменуют?
Ответ. Iсус имя аще прежде сего жидове и обще употребляху: но егда Слово превечное, единородныи Сын Божии, восприем на ся человеческое естество, тогда сие имя Iсус ангелом Гавриилом от Бога с небес принесено есть, еже знаменует Спасителя [Афан., в слове 3, на ариан]: якоже Матфей евангелист написует [Матф. глава 1]: родит же сына, и наречеши имя ему Iсус, Той бо спасет люди своя от грех их, и от того времене сие имя бысть особное и избранное: в нем же человеческое спасение показуется, по реченному [Деян. глава 4]: несть о ином ни о едином же спасениа: несть бо иного имене под небесем даннаго в человецех, о нем же подобает спастися нам. и сие имя сицевыя есть чести, яко и ангел, человеци, и диаволи нань уповати и кланятися имут, по писанному апостолом Павлом [филип. глава 2]: и дарова Ему имя, еже паче всякаго имене: да о имени Iсусове всяко колено поклонится, небесных и земных, и преисподних.

Вопрос. В какове чести от нас имать быти имя Iсус?
Ответ.  Первое воспоминати е со всякою честию и со страхом благочестно с помышлением безгрешнаго страдания Христова, к сему с воздыханием и с молением, яко да ради Его, и волнаго страдания своего, грехи нашя отпустит, и милостив нам будет ныне и вовремя смерти, и в день праведнаго суда Его [Дамаск. книга 1].

Вопрос. Христос что толкуется?
Ответ. Христос толкуется помазанец [Дамаск. в слове на рожество Богородицы]: якоже в ветхом законе на три чины елеом помазовахуся: на священьство, на царство, и на пророчество. тако и Христос Iсус помазанец Божии: Егоже по человечеству не елеом, но Духом Святым Бог Отец помаза на тыя три чины, по пророчеству Исаину, и во евангелии глаголющему [Ис 61; Лк 4]: Дух Господень на Мне, Егоже ради помаза Мя, благовестити нищим посла Мя, исцелити сокрушенныя сердцем, проповедати плененым отпущение, и слепым прозрение: отпустити сокрушенныя во отраду. и в сем свидетелстве все три чины Христовы изображены суть, и на Нем се исполнися: якоже и сам о себе глаголет, тамже ниже: яко днесь събысться писание се во ушию вашею.

Вопрос. Научи мя о тех трех чинех Христовых.
Ответ. Христос есть первее священником, по чину Мелхиседекову, якоже глаголет о Нем апостол, наречен есть от Бога первосвященник, по чину Мелхиседекову [евреем глава 5]: нарицаетжеся священник того ради: яко самого себе на жертву принесе [Злат. в слове 8 о риз. священ. книга 5]. первее во образех хлеба и вина за очищение наше. потом егда кровь свою излия якоже той же апостол глаголет [евреем глава 9], аще бо кровь козлия и телчая, и пепел юнчии кропящии оскверненыя освящает к плотней чистоте, колми паче кровь Христова, иже Духом Святым себе принесе непорочна Богу, не очистит ли совесть нашю от мертвых дел, воеже служити нам Богу живу и истинну. Царем же вечным называет Его ангел благовествуя [Лука глава 1]: и даст ему Господь Бог престол Давыда отца Его, и воцарится в дому Иаковли вовеки, и царствию Его не будет конца: якоже и титла яже на кресте Его свидетельствует, Iсус назарянин, царь июдейскии [Иоан. глава 19]. а яже паки приуподобляется пророческому чину, то все яже что любо проповедаше и чесому научаше, чин пророческии быти сказуется.

Вопрос. Чесо ради единородным Сыном Божиим нарицается?
Ответ. Двоих ради вин [Злат. о непостиж., бес. 1; Иоан. глава 1]: первое разньства ради от Сыновни ипостаси Духа Святаго, яже от Бога же и Отца прозябает, но не образом рождения, но исхождениа. единородным же нарицается разньства ради и от сынов иже токмо по благодати именуемии, якоже вернии, и избраннии Богу. по естеству убо сам точию един Iсус Христос единородным Сыном Божиим нарицается, яко от существа и от Отча состава прежде всех век безначално рожден есть [Дамаск. книга 4, глава 8].

Вопрос. Которыи есть третии артикул веры?
Ответ. Нас деля человек, и нашего ради спасения сошедшаго с небес, и воплотившагося от Духа Свята, и Марии Девы вочеловечьшася.

Вопрос. Многим ли вещем научает сей артикул?
Ответ. Четырем: первее, яко Сын Божии превечныи спасения ради человеческаго, благоволением Бога Отца, и Духа Святаго, сниде на землю [Дамаск. книга 3 глава 1, и 2; Афан. в слове о вочеловеч.]. сниде же не от места в место, понеже по божеству везде сыи, и вся исполняя, но смирив себе, и бысть человек: якоже святыи апостол Павел глаголет [фил. глава 2]: иже во образе Божии сыи не восхищением непщевав быти равен Богу. но себе умалил, зрак раба прием, в подобии человечестем быв, и образом обретеся якоже человек, смирил себе, послушлив быв даже до смерти. не пременив божества в человечество, ниже человечества в божество: но бе Бог сыи истинен, восприят на ся совершеное человечество: и бысть вкупе Бог и человек, во едином составе божества, во обою существу свойства цела сохранив [Вас. Вел. о естестве челов. в Христе быт. глава 5; Дамаск. книга 3 глава 3]: и сице истинныи есть Бог, и истинныи человек, якоже о сем явственно научает, и святыи апостол Павел [Тим. глава 3]: воистину велия есть благочестиа тайна, Бог явися в плоти.

Вопрос. Чесому второму научает сей артикул?
Ответ. Научает, яко Христос с собою человечества с небесе не принесе, но действом Духа Святаго восприят от пречистыя Девы Марии вовремя архангельскаго благовещения, идеже егда и отвеща рекущи [Лука глава 1]: се раба Господня, буди мне по глаголу твоему: и с словом архангеловым во утробе пречистыя Девы, совершеное божество Сына Божия, со истиным овершеным человечеством зачатся [Дамаск. книга 3, глава 2]: иже по божеству прежде век от Бога Отца рожден есть: а иже по человечеству от матере под леты, совершен с телом и душею человек.

Вопрос. Чесого третияго научает сей артикул?
Ответ. Яко зачатие Сына Божия во утробе Девыя по человечеству, действом Святаго Духа бысть якоже сказует ангел егда глаголет к Деве [Лука глава 1]: Дух Святыи найдет на тя и сила Вышняго осенит тя: темже и рождаемое свято, наречется Сын Божии. такоже и на ином месте пишет [Матф. глава 1]: се ангел Господень во сне явися ему глаголя, Иосифе сыне Давыдов, не убойся прияти Марию жену твою: рождьшеебося в ней от Духа есть Свята. тем пречистая Дева Мария, якоже прежде зачатия, и в зачатии, и по зачатии девою бысть: тако и прежде рожества, и в рожестве, и по рожестве паки девою бысть, и пречистою Богородицею [Дамаск. книга 3, глава 3].

Вопрос. Чесому четвертому научает сей артикул?
Ответ. Научает о пречистей Деве: яко яже прежде век избранная, и предзнаменованная сущи от родов, мати Сына Божия, боголепотною честию от нас величаема и прославляема быти имать.

Вопрос. Како пречистую Деву чтити, и величати и прославляти имам?
Ответ. Аще и много образов есть почитания избранных Божиих святых, обаче о пречистей Деве тако потреба разумевати якоже святая восточная соборная и апостольская церковь научает. яко Богородицу Деву почитати и возвышати достоит, не токмо паче всех святых, но и над вся ангельския чины, над херувимы, и серафимы [Дамаск. в слове на рож. и успен. Богородици]. и по Господе Бозе, первую, достойною честию разумевати, по словесех тоя самыя святыя Богородицы, во святом евангелии лежащих [Лука глава 1], се бо отныне блажат мя вси роди: при том и на всякии день множицею должни есмы, якоже в молитвах своих, тако и кроме молитв будучи исправляти архангельское целование или благовещение сие глаголюще сице: Богородице Дево радуися обрадованная Мария Господь с тобою, благословена ты в женах, и благословен плод чрева твоего: яко родила еси Христа Спаса и Избавителя душам нашим.

Вопрос. Како имам разумети о сем поздоровлении?
Ответ. Первое имаши ведати о сем тако, яко сие поздоровление, не человеческии смысл состави, но от Господа Бога с небес архангелом Гавриилом принесено есть [Лука глава 1]. зане же николиже бы ангел потщася сам собою, благовестити Деве, аще не бы имел заповеданнаго о сем от Господа Бога. другая же словеса разумети имаши, святыя Елисаветы, яже иногда исполнь сущи Духа Свята, и пророчествующи рекла, к сей же Деве и Богородице: якоже свидетельствует о сем Лука евангелист, некоторая же паки к сему якоже святая церковь приложи от достоиньства своего [3 собор Ефес.].

Вопрос. Что за учение есть в сем поздоровлении?
Ответ. Первое в сем поздоровлении, воспоминается воплощение Бога Слова. потом егда коли глаголется сие поздоровление, тогда от сего осуждаются вси еретици, не исповедующии Господа Христа воистину воплощьшася от пречистыя Девы. такоже осуждаются и несториане, не нарицающии Девы пречистыя Богородицею. в сем же воспоминающе и поздравляюще сию пречистую Богородицу, многажды приобретаем ю молитвенницу о нас, к Сыну своему и Богу нашему, яко да избавит нас от грех наших, вкупе же и враг видимых и невидимых, имже егда и при акафистах, и молебнах множицею должни есмы сие поздоровление глаголати, дабы нас она омофором своим покрывши защитила от всякаго зла.

Вопрос. Которыи есть четвертыи артикул?
Ответ. Распятаго за ны при Понтийстем Пилате, и страдавша и погребена.

Вопрос. Многим ли вещем научаемся в сем артикуле?
Ответ. Шестим: первое, якоже воистину человечество Христос Бог от пречистыя Девы прият, тако воистину в том человечестве претерпе и умре, идеже и евангелие свидетельствует о нем тако: и возглаголаш гласом велиим Iсус рече, Отче в руце Твои предаю дух Мой: и сия рек издше.

Вопрос. Чесому второму научаемся от сего артикула?
Ответ. Яко Христос Господь безгрешен сыи, яко овча избавления ради грех наших пострада и умре, и кровь свою честную излия: якоже и святыи апостол Петр глаголет [1 Пет., глава 1]: ведуще яко неистленным сребром или златом избавистеся от суетнаго вашего жития отцы поданнаго, но честною кровию яко Агньца непорочна и пречиста Христа.

Вопрос. Чесому третиему научает сей артикул?
Ответ. Научает, яко Христос точию по человечеству на кресте пострада, а божество Его ничтоже пострада [Дамаск. книга 3 глава 8]: якоже святыи апостол Павел глаголет [колас. глава 4]: ныне же примири в теле плоти своея смертию Его, представити вас святы и непорочны и неповинны пред собою: аще достоит в лепоту рещи, Бог во плоти страда.

Вопрос. Чесому четвертому научает сей артикул?
Ответ. Учит яко страдание Христа Господа, паче иных человек бысть, якоже о том и пророк от лица Христова предвозгласи [плачь Иеремии, глава 1, стих 12]: вси иже к вам проходящии путь, дася обратят и да видят, аще есть болезнь, яко болезнь моя. смерть бо Христова превосходительнейша бысть, понеже самого себе яко жертву непорочну принесе за люди: якоже святыи апостол Павел глаголет [ефес. глава 5]: предаде себе за ны, приношение и жертву Богу в воню благоухания. и инде [1 Тим. глава 2]: давыи себе избавление за всех.

Вопрос. Чесого пятаго научает сей артикул?
Ответ. Научает, яко Сын Божии воистину яко человек умре, и погребен бысть именитыма и славныма человекома во языце жидовском, Иосифом и Никодимом [Матф. глава 27]. прочее же к тому тело Его во гробе и запечатлено было, и стражи хранимо, имже и знаменитее еже из мертвых воскресение Его было. и гроб Его по пророчеству славен бысть [Дамаск. беседа о субот.], к нему же и ныне аще кто со благоговением приидет, и верою правою множество грехов очистит.

Вопрос. Чесого шестаго научает сей артикул?
Ответ. Научает, яко в смерти Христове божество ниже от души, ниже от телесе Его отлучися [Дамаск. книга 3 глава 29]: но душа Его с божеством сниде во ад, и изведе оттуду вся святыя отцы, и вкупе с разбойником в рай введе. такоже с Богом Отцем и Святым Духом по единству божества на престоле и на небеси бе, и плотию на кресте и во гробе.

Вопрос. Понеже воспомянул еси о кресте, на немже Сын Божии плотию пострада, научи мене како о нем имам разумети?
Ответ. Понеже о кресте воспомянух [Кирил Иерос. оглашен. глава 13], подобает его в велицей чести содержати, и употреблятися о нем выну: занеже Христос Господь спасение нам содея на нем. имже и святыи апостол Павел, егда им хвалитися сице о нем глаголет [галат. глава 6]: мне же да не будет хвалитися, точию о кресте Господа нашего Iсуса Христа, имже мне весь мир распятся, и аз всему миру. сицевым образом и всякии християнин святым крестом да хвалится, и часто украшается, имея знамение его на себе, в церкви, в дому же и в пути [Дамаск. книга 4 глава 12]; и ко всякому делу приступая, преже от знамения святаго креста да творит начало, глаголю же молитвы брашно, и питие. понеже неприятель душ наших, силы ради Распеншагося на том кресте спасения ради человек, не могии зрети на то крестное знамение, бежит от нас. и не может нам пакости принести к доброму [Злат. в слове на евномиан и на многих местех].

Вопрос. Коим образом знамение святаго креста имам на себе полагати?
Ответ. Совокупити три персты правыя руки; сиречь великаго и малаго, и третиаго что подле малаго: в них же исповедуем таинство божественных триех ипостасей, Отца, и Сына, и Святаго Духа единого Бога в триех лицех. два же перста протягнути вышнии и среднии, и сим показуем тайну самого Господа нашего Iсуса Христа, яко совершен Бог и совершен человек бысть нашего ради спасения. и тако сложивше персты, полагаем первое руку на чело, исповедующе яко едина истиная и вечная наша глава. Христос есть. якоже глаголет апостол [ефес. зач. 219], Господа нашего Бог Отец даде главу всех выше церквей, еже есть тело Его. потомже кладем руку на живот, исповедующе снитие Его на землю, и еже в пречистем чреве Богоматере безсеменное Его зачатие, Той бо пройде утробу ея яко солнце стекло, не вредив ключа Девы рожеством своим. потомже кладем на правое плече, исповедующе яко седит одесную Бога Отца. прочее ожидая дондеже положатся врази Его под нозе Его. потомже кладем на левое плечо, образующе, яко приидет паки второе на суд, и воздаст ошуюю сущим муку вечную, а одесную сущим вечныи живот. и тако прекрестивше лице свое знамением крестным, глаголюще и молитву, Господи Iсусе Христе Сыне Божии помилуй мя грешнаго, скончавая аминь, покланяемся Богу, яко да ошуяго стояния избавит нас, и благословение свое подаст нам.

Вопрос. Которыи есть пятыи артикул?
Ответ. И воскресшаго в третии день по писанием.

Вопрос. Многим ли вещем научает сей артикул?
Ответ. Двоему: Первое, яко Сын Божии, якоже сам волею своею умре, сице силою Божества своего сам и из мертвых воста, по истинному своему словеси идеже глаголет сего ради Мя Отец любит, яко Аз душю мою полагаю, да паки прииму ю. никтоже возмет ю от Мене, но Аз полагаю ю о себе. область имам положити ю, и область имам паки прияти ю [Иоан. глава 10]. и се по писанию святых пророк, якоже сам глаголет [Лука глава 24], не сия ли подобаше пострадати Христу, и внити в славу свою: и начен от Моисея и от всех пророк сказааше има, и от всех писании яже о Нем.

Вопрос. Чесому второму научает сей артикул?
Ответ. Научает, яко в том же сущем своем теле из мертвых воста, в нем же, и пострада и умре [Дамаск. книга 14 глава 58]. о нем же и раны свидетельствуют, которыя в руках, и ногах, и ребрах имел, ихже по воскресении из мертвых, и учеником своим показа глаголя [Лука глава 24]: видите руце Мои и нозе Мои, яко сам Аз есмь. осяжите Мя и видите, яко дух плоти и кости не имать, якоже Мене видите имуща: обаче то тело прославленое славою, ктому уже не подлежит немощем человеческим, яже прежде смерти име.

Вопрос. Которыи есть шестыи артикул веры?
Ответ. И возшедшаго на небеса и седяща одесную Отца.

Вопрос. Многим ли вещем научает сей артикул?
Ответ. Четырем [Дамаск. о вознес. Господни]: первое, яко которое тело Сын Божии восприят от пречистыя Девы, в немже пострада и умре, и из мертвых воскрес, в томже по воскресении из мертвых со славою и на небо взыде [Дамаск. книга 4 глава 1]. якоже свидетельствует Лука евангелист [Деян. глава 1]: и сия рек зрящим им взятся, и облак подъят Его от очию их, и седе одесную Бога Отца. якоже и Марко евангелист свидетельствует о сем [Марк. глава 16; Дамаск. книга 4 глава 2], Господь же убо по глаголании Его к ним вознесеся на небо, и седе одесную Бога.

Вопрос. Чесому второму научает сей артикул?
Ответ. Научает, яко Христос с плотию взыде на небо, по божеству бо всегда со Отцем бе, и николиже от Него отлучися, яко единосущен Ему сыи: якоже о Нем свидетельствует Иоанн евангелист [Иоан. глава 1]: Бога никтоже виде нигдеже. единородныи Сын, сыи в лоне Отчи, Той исповеда. в лоне же слыша Отчи, то есть единого существа быти Ему.

Вопрос. Чесому третиему научает сей артикул?
Ответ. Учит: яко тела сего ктому николиже оставит, еже единою прият. но вовеки е имети будет, по реченному Iсус Христос вчера и днесь, Тойже и вовеки [евреом глава 13; Афан. о воплощении Бога Слова].

Вопрос. Чесого четвертаго учит сей артикул?
Ответ. Научает, яко плотию Христос на небеси точию есть, а не везде по апостолову словеси [колас. глава 3; Дамаск. книга 4 глава 4]: Христос есть одесную Бога седяи: разве пресвятыя тайны, еже в виде хлеба истинное пресвятое Его тело, и еже в вине истинная кровь Его есть: еже бывает от Духа Святаго сходящаго над дары призыванием от священника: о немже будет на своем месте учение.

Вопрос. Которыи есть седмыи артикул веры?
Ответ. И паки грядущаго со славою судити живым и мертвым, Егоже царствию несть конца [Деян. глава 1; Лука глава 1].

Вопрос. Многим ли вещем научает сей артикул?
Ответ. Трем: первей, яко Христос приити имать паки на землю судити живым и мертвым. обаче не тако якоже первее смиренно и уничиженно, но в славе и величестве, якоже сам о себе глаголет: и узрят Сына человеческаго грядущаго на облацех небесных с силою и славою великою. прежде Его пришествия знамения известная предварят якоже слышим в Матфеи евангелисте.

Вопрос. Чесого другаго научает сей артикул?
Ответ. Научает, яко в той последнии день праведнаго суда Божия, воздадут человеци слово о всех своих мыслех, и праздных словесех и делех [Дамаск. слово о умерших], якоже сам Избавитель учит: глаголю вам яко всяко слово праздно, еже аще рекут человеци, воздадят о нем слово в день судныи.

Вопрос. Чесого третияго научает сей артикул?
Ответ. Научает, яко в той последнии день всяк кождо по делом своим восприимет. ови царство небесное наследят, к ним же речется [Матф. глава 25], приидите благословении Отца Моего, наследуйте уготованное вам царство от сложения мира. ови же муку вечную, к ним же глаголано будет, отъидите от Мене проклятии во огнь вечныи, уготованныи диаволу и ангелом его.

Вопрос. Которыи есть осмыи артикул веры?
Ответ. И в Духа Святаго и животворящаго, от Отца исходящаго, со Отцем и с Сыном съпокланяема, и сславима, глаголавшаго пророки.

Вопрос. Многим ли вещем научает сей артикул?
Ответ. Трем [Дамаск. книга 1 глава 1; Вас. Вел. в слове о Св. Дусе]: первее, яко Дух Святыи истинныи есть Бог, соприсносущен Богу Отцу и Сыну, и единоя силы с ними, славы же и величества: якоже о том и святыи апостол Павел научает нас, сице глаголя [1 корин. глава 12; Афан. в симв.; Дионис. о Бож. имен.], разделения же дарованием суть, а Тойже Дух. и разделения служении суть, а Тойжде Господь. и разделения действом суть, а тойжде Бог, действуяи вся во всех.

Вопрос. Чесому второму научает сей артикул?
Ответ. Научает, яко Дух Святыи от единого Отча состава, яко от источника и корени в божестве от существа Его прежде век изыде [2 собор; Дион. о Бож. имен. глава 2], по Спасителеву учению [Иоан. глава 15; Дамаск. книга 1 глава 8, 9 и 10]: егда же приидет Утешитель, Егоже Аз послю вам от Отца Дух истинныи, иже от Отца исходит, Той свидетельствует о Мне. тако Господь научи, апостоли, соборы, и святии отци. за сию веру и мученици пострадаша.

Вопрос. Чесого третияго научает сей артикул?
Ответ. Научает, якоже в ветхом законе, тако и в новом пророки и апостолы сказася, яко Дух Святыи есть изобретатель и податель писания святаго [Афан. о воплощ. Слова Божия], по апостольску учению [1 Пет. посл. глава 1]: нибо волею бысть когда человеком пророчество, но от Святаго Духа просвещаеми, глаголаша Божии человеци.

Вопрос. Много ли есть даров Духа Святаго?
Ответ. Седмь, якоже их описал Исаия пророк и Иоанн святыи во Откровении своем [Исаия глава 11; Апок. глава 4; Феофил. на Матф. глава 12].

Вопрос. Которыи есть первыи дар Духа Святаго?
Ответ. Премудрость, яже от небес даема бывает, в познавании божественых вещей, о нейже нас писание тако учит [Иаков глава 3]: яже свыше премудрость, первее убо чиста есть, потом же мирна, кротка, благопокорлива, исполнь милости и плодов благих, несуменна, и нелицемерна. сей противна есть мудрость мира сего, яже есть буйством у Бога, о нейже апостол Павел глаголет [1 кор. глава 1, 2], не обуяли Бог премудрость мира сего.

Вопрос. Которыи есть вторыи дар Духа Святаго?
Ответ. Есть смысл таинств веры, и воли Божии, якоже писание святое учит [Исход глава 36]: даде Господь Бог премудрость и разум во всяком писании и премудрости. и апостол к Тимофею глаголет [2 Тим. глава 2]: даст бо тебе Господь разум о всем. сему противно есть окаменение и нечювствие сердца, к верованию и познанию. якоже Спаситель глаголет [Лука глава 24]: о несмысленная и косная сердцем, еже веровати о всех, яже глаголаша пророци.

Вопрос. Которыи есть третии дар Духа Святаго?
Ответ. Совет: егда кому даст Господь Бог ведение себе же и другу совещати, яже на спасение подобает, о немже и святыи апостол тако глаголет [Деян. глава 20]: не обинухбося еже не сказати вам всю волю Божию. противно есть сему совету, нечестивых совет. о немже глаголет пророк [псалом 1]: блажен муж, иже нейде на совет нечестивых.

Вопрос. Которыи есть четвертыи дар Духа Святаго?
Ответ. Крепость, или мужество в вере истинней, и в житии благочестном, о нейже нас писание святое сице учит [1 кор. глава 12]. бодрствуйте, стойте в вере, мужайтеся, утвержайтеся. сему противно есть страх нечестивых. о немже писание тако глаголет [псалом 52]: тамо убояшася страха, идеже не бе страха.

Вопрос. Которыи есть пятыи дар Духа Святаго?
Ответ. Ведение закону и воли Божии: о нем же пророк от лица сице глаголет Бога [Иерем. глава 3]: дам вам пастырей по сердцу Моему. и будут паствити вас ведением и учением. противно есть сему незнание и неведение Бога, и закона Его: о нем же во псалмех тако глаголет [псалом 78]: излей гнев Твой на языки незнающыя Тебе, и на царствия яже имени Твоего не призваша.

Вопрос. Которыи есть шестыи дар Духа Святаго? Ответ.  Благочестие: еже всегда зрится при блазей вере же и добрых делех: в молитве же и в мудрствовании благодейств Божиих: о нем же апостол тако глаголет [1 Тим. глава 19]: благочестие на все полезно есть, обетование имея животу нынешняго и грядущаго. тому противно есть всякое нечестие, еже ни веры, ни добродетели имать.

Вопрос. Которыи есть седмыи дар Духа Святаго?
Ответ. Страх Божии иже нарицается сыновен, о нем же во псалмех глаголет [псалом 33]: бойтеся Господа вси святии Его. тому противно есть, еже Бога не боятися. или убо боятися рабиим образом, якоже апостол глаголет [1Иоан. глава 4]: страха несть в любви, но совершена любы вон изгоняет страх. яко страх муку имать. бояижеся не совершается в любви. страх же сыновен есть, дар Духа Святаго, еже добре веровати в Господа Бога, и непреткновенно соблюдати святыя, Его заповеди.

Вопрос. Много ли есть плодов Духа Святаго?
Ответ. Всякая добродетель, и всякое благочестие, плоды суть Духа Святаго глаголются, по реченному [ефес. глава 5], плод духовныи есть во всякой благостыни, и правде, и истине. и инде исчисляет апостол плоды Духа Святаго сице глаголя [галат. глава 5]: плод же духовныи есть, любы, радость, мир, долготерпение, благость, милосердие, вера, кротость, воздержание, на таковых несть закона.

Вопрос. Которыи есть девятыи артикул?
Ответ. Во едину святую соборную, апостольскую церковь.

Вопрос. Многим ли вещем научает сей артикул?
Ответ. Четырем: первей, яко едина святая соборная апостольская церковь, обручницею Христовою есть, якоже святыи апостол Павел глаголет [2 кол. глава 11; ефес. глава 4]: обручих бо вас единому мужу, деву чисту представити Христови. ктому едина есть вера, едино крещение, един Бог: прочее едина есть истинная и церковь.

Вопрос. Что есть церковь?
Ответ. Церковь есть собрание верных Божиих, во имя Господа нашего Iсуса Христа соединеных во исповедании веры, и апостольстем учении во всем мире, яко удов во едином теле Христове. под единою главою единаго Господа нашего Iсуса Христа, и в повиновении подобающем обретающихся [ефес. глава 5].

Вопрос. Чесому второму научает сей артикул?
Ответ. Научает [Злат. на псал. 43], яко сия церковь соборная ни едина от человек имать нарицания себе, токмо от самого Христа, Которыи ея кровию своею честною искупи, и вечно себе обручи. и един главою ей яко приснаго тела есть.

Вопрос. Которая церковь есть первая в начале?
Ответ. Церковь в начале Иеросалимская: сия бо есть материю учителною всех иных церквей, якоже о ней писание свидетельствует, и проповедатися во имя Его покаянию, и отпущению грехов во всех языцех: наченше от Иеросалима [Лука глава 24]. и инде пишет [Деян. глава 15]: бывши же убо распри и стязанию не малу Павлу и Варнаве к ним, учиниша Павлу и Варнаве, и неким другим от них, ко апостолом и старцем во Иеросалим, о вопрошении сем. и на ином месте [Деян. глава 16]: и якоже прохождаху грады, предаяху им хранити нравы сужденыя от апостол и старец, иже во Иеросалиме. и тако церкви утвержахуся верою, и прибываху в число по вся дни.

Вопрос. Чесому третиему научает сей артикул?
Ответ. Научает яко основанием и главою никтоже ин есть, токмо Христос, якоже писание святое учит [1 кор. глава 3]: основания бо иного никтоже может положити паче лежащаго, иже есть Iсус Христос. вся покори под нозе Его, и Того даде главу выше всех церквей, яже есть тело Его. и инде [ефес. глава 1]: и Той есть глава телу церкве, иже есть начаток перворожден из мертвых, яко да будет во всех Той первеньствуя. и инде [ефес. глава 5]: зане муж есть глава жене, якоже и Христос глава церкви.

Вопрос. Чесого четвертаго научает сей артикул?
Ответ. Учит того [Вас. Вел. на псал. 44], дабы есмы святей церкви яко матери нашей всякое покорение и послушание во всем отдавали, по заповеди Христове, рекшаго [Матф. глава 18]: аще не послушает кто свидетелей, повеждь церкви: аще же и церковь преслушает, буди ти яко язычник и мытарь. имать церковь и сию честь от Христа яко не токмо простых людей наказует, но и клириков, епископов же, и архиепископов болших, на соборе вселенском по винам их под запрещение влагати, и отлучати, яже сама едина сущи столпом и утвержением истины [1 Тим. глава 3]. имать же и писание святое толковати, и учители похваляти, и прославляти.

Вопрос. Много ли есть церковных заповедей?
Ответ. Аще их есть и немало, но главнейших есть девять: первое на всякии день по обычаю христианьскому, подобающее благочестие, еже любослушати пения в церкви, или самому отправити усердне якоже се, утреню часы, вечерню, и павечерню. а где лучится быти и святей литургии, то и болшее слушати, наипаче же во дни праздничныя, и неделныя. вонь же егда святыя литургии христианин не слушает, здрав сыи и не в пути. наипаче же егда церковь близу есть, смертно согрешает. благочестивому убо непрестанно молитися подобает по реченному [1 сел. глава 5]: непрестанно молитися. такоже учение где бывает, с прилежанием слушати: и о исполнении яже к житию христианскому подобает тщатися.

Вопрос. Которая есть вторая заповедь церковная?
Ответ. Четыре посты поститися в лете по обычаю христианскому [прав. апост. 69]. Первыи пред рожеством Христовым, иже начинается в 15 ноемврия. Вторыи пост великии, иже сам Господь постился: якоже о Нем евангелист пишет [Матф. глава 4]: и постився дней, 40, и нощей, 40, последи взалка. Третии пост апостольскии, иже начинается по недели всех святых, на память того егда апостоли посылающе на проповедь евангелиа, постилися молящеся Господу Богу, яко да поможет им, яко же писание свидетельствует [Деян. глава 3]: тогда постившеся и помолившеся, и возложше руки на ня, послаша их. тако и мы постимся моляще Господа, яко да тоже евангелие, еже апостоли проповедали, распространение свое имело, и плод в человеческих сердцах прозябало. Четвертыи пост зачинается перваго дня августа месяца, и пребывает даже до Успения Пресвятыя Богородицы.

Вопрос. Есть ли к тому еще иныи пост?
Ответ. Во всякой недели должни есмы среду и пятницу поститися, по правилу 69 святых апостол. не поститижеся суботы и недели, и иных некоторых дней заповеданных, кроме великия суботы. в посте же паки провождати подобает, 14, день септеврия, воздвижениа ради честнаго креста, и воспоминаниа ради волнаго страдания Христова: понеже того дне и евангелие о страстех Христовых чтется. такоже и 29 день августа месяца, усекновения ради честныя главы святаго пророка Иоанна Крестителя, в посте паки соблюдати, и навечерия Рожества Христова, и Богоявления.

Вопрос. Которая есть третия заповедь церковная?
Ответ. Священников в велицей и достойней чести имети, яко Божиих слуг, и ходатаев наших, наипаче же духовнаго своего отца. такоже и тех которыя труждаются в проповеди слова Божия по реченному [1 Тим. глава 5]: прилежащии же добре попы, сугубыя чести да сподобляются, паче же труждающиися в слове и учении.

Вопрос. Которая есть четвертая заповедь церковная?
Ответ. Четырищи летом подобает исповедатися. аще и частее благоговейнейшии могут: но никтоже паки да не имеет того которыи бы не имел ни единою летом исповедатися: таковыи бо под клятвою и отлучением от церкве.

Вопрос. Которая есть пятая заповедь церковная?
Ответ. Еретических книг не прочитати, и к соборищам их не ходити, и учения не слушати [прав. апост. 64; соб. Лаод. прав. 31, 32, 33, и 34]. такоже не сущу кому ученому, в словопрение с ними не въдаватися, и всячески отрицатися их, по писаному [Тим. глава 3], еретика человека по первом и втором наказании отрицайся.

Вопрос. Которая есть шестая заповедь церковная?
Ответ. Господа Бога просити и молити за вся иже во власти суть, за царя же и за синклит, и за всю общую вещь. такоже и за духовныя власти. наипаче же за тех, иже тщатся распространяти славу Божию: к сему бо нас и апостол научает глаголя [1 Тим. глава 2]: молю убо прежде всех творити молитвы, моления, прошения, благодарения за вся человеки, за царя, и за вся иже во власти суть, да тихо и безмолвно житие поживем, во всяком благоверии и чистоте. се бо добро и приятно пред Спасителем нашим Богом, иже всем человеком хощет спастися, и в разум истинныи приити. такоже подобает молитися Господу Богу и о обращении язык, и неверных еретиков и отступников, ко святей истинней и вселеньстей церкви Христове. прочее должни есмы Господа Бога молити и о сем, яко да избавит от работы языческия всех христиан.

Вопрос. Которая есть седмая заповедь церковная?
Ответ. Посты, молитвы, милостыни, служения братии нашей, с советом и повелением духовных. со тщанием должни есмы приимати и исправляти. понеже сицевыи обычай и при апостолех бысть якоже святое писание свидетельствует [Деян. глава 12]: и убо Петра стрежаху в темнице, молитва же бе прилежна бываема от церкве к Богу о нем.

Вопрос. Которая есть осмая заповедь церковная?
Ответ. Человек мирскии, яже преданая суть церкви, никакоже да имать взимати на потребу свою, аще будут лежащыя, аще движимыя: такожде и духовнии да не имут их зле употребляти, но на потребу духовных и убогих людей изнуряти, потом на украшение и пригожение церковное. наипаче же епископове тая имения церковная да истощаявают, на странноприимницы, на школы, и на пленники. и места им такия дозирати, которыя помощи требуют, якоже христиане творили во дни святых апостол, о чем и писание сице глаголет [Деян. глава 11], ученики же аще имеяше кто, повелеша кождо их на службу послати живущым во июдеи братиям. еже и сотвориша, пославше к старцем рукою Варнавлею и Савлею.

Вопрос. Которая есть девятая заповедь церковная?
Ответ. Брака в заповеданныя дни не творити [Вас. Вел. ко Амфилох. прав. 27; соб. 6 прав. 24], и в сродстве не поиматися, такоже на игрища неподобныя не ходити, и от обычаев непристойных соблюдатися.

Вопрос. Которыи есть десятыи артикул веры?
Ответ. Исповедую едино крещение во оставление грехов.

Вопрос. Многим ли вещем научает сей артикул?
Ответ. Идеже воспоминается о святом крещении ту подает образ нам к разумению святых Господних таин.

Вопрос. Что есть тайна?
Ответ. Тайна есть видимая вещь, уставлена же есть от Христа [Дамаск. книга 4 глава 14]: яже егда освящена бывает от священника, и ко употреблению человеком подаваема, приносит нам от Господа Бога невидимую благодать, освящающую человека и до вечнаго живота въспомогающую.

Вопрос. Много ли вещей разумеется в тайне?
Ответ. Четыре: первая вещь, истинная и известная самая вещь, уставленая от Христа. вторая, словеса, ими же тайна освящение свое приемлет, силою Духа Святаго. третия, от кого тех таин сподобляемся. четвертая, дело тайны.

Вопрос. Много ли есть всех таин?
Ответ. По числу даров Святаго Духа Святаго седмь: еже церковию святою соборною утвержено есть.

Вопрос. Которая есть первая тайна?
Ответ. Крещение: которая есть порождением от воды и Духа, и ввожением к церкви Божии, и оттуду к царству небесному, по реченному [Иоан. глава 3], аминь, аминь глаголю тебе, аще кто не родится от воды и Духа, не может внити в царство небесное.

Вопрос. Что имать соблюдено быти в той тайне?
Ответ. Ведают о сем священници, действующии в тайнах: якоже их научают церковнии потребники: вещь убо всегда бывает вода единая собою естественая, в ней же последи иных последовании, описаных в потребах, священник егда крестит, должен глаголати сия словеса Христова: крещается раб Божии во имя Отца и Сына и Святаго Духа. тая бо словеса с трема погружении совершают крещение.

Вопрос. Кая польза святаго крещения?
Ответ. Егда человек в крещении в воде погружается и измывается, тогда невидимо в души первородныи грех отмывает и очищает, якоже святыи апостол Павел научает [1 кор. глава 6; Григ. Ниск. о крещ. Христове]: но омыстеся, но освятистеся, но оправдистеся именем Господа нашего Iсуса Христа, и Духом Бога нашего. в то время бываем удами Христовыми, и в Него облекаемся, по того же апостола Павла учению [гал. глава 3]: елици бо во Христа крестистеся, во Христа облекостеся. и сице бываем наследници Богу, сънаследници же Христу [рим. глава 8].

Вопрос. Что разумеется в том, егда кто приступает к святому крещению?
Ответ. Подобает хотящему восприяти веру христианьскую [Потребник Кир. оглашен. 11], прежде крещения своего исповедати ю, аще совершен возрастом, самому собою [Дион. о церков. священнонач. глава 2]. аще ли младенец, то теми иже при крещении бывают, и за него обещаваются, чтобы более к тому подобало: еже самым то священником ведати достоит.

Вопрос. Которая есть вторая тайна?
Ответ. Хризма, или миропомазание [Дион. о церков. священнонач. глава 4]: еже есть утвержение святаго крещениа. которое крепка и вооружена устрояет крестившагося: и непобедима воина Христова показует от всех навет невидимаго врага. по миропомазании бо и Духа Святаго восприятие бывает, яково бывало и во время святых апостол возложением рук, якоже о том и писание свидетельствует [Деян. глава 8]: тогда возложиша руце на ня и прияша Дух Свят, якоже и ныне помазанием, о нем же и святыи апостол Павел тако учит [2 кор. глава 1]. извествуяи же нас с вами во Христа, и помазавыи нас Бог, иже и запечатлевыи нас, и давыи обручение Духа в сердца наша.

Вопрос. Что подобает разумети в тайне миропомазания?
Ответ. Первее вещь освященая уготованная, юже сами болшии архиереове освящают, от них же священницы приемлют себе к сей тайне, по описанному обычаю: в нем же должни сицевая слова употребляти: Печать дара Духа Святаго. Понеже се дело сея тайны над всяким да бывает, над ним же по крещении сея тайны употребляют, о ней же во образи явствено и святыи Павел сице глаголя: егда же благодать и человеколюбие явися Спаса нашего Бога, не от дел праведных их же сотворихом мы, но по своей Его милости спасе нас, банею паки бытия, и обновлением Духа Святаго, Егоже излия на нас обилно Iсус Христом Спасителем нашим.

Вопрос. Что разумеется в том, которыи к сей тайне приступает?
Ответ. Первее, яко дабы скоро по крещении немедлено сия святая тайна над крещающимся совершилася, аще младенец будет, аще в возрасте: понеже святая церковь тыя тайны вкупе совокупила, крещение, и миропомазание. помазованы же бывают известныя уды тела. якоже о том в потребниках священници описано имут.

Вопрос. Которая есть третьяя тайна?
Ответ. Тайная вечеря Господня, на ней же истинное тело и кровь Христова, в виде хлеба и вина в воспоминание страдания Христова, и на вечное спасение наше бывает [Дамаск. книга 4 глава 9], освященно и ядимо по словеси Павла апостола [1 кор. глава 11]: елижды бо аще ясте хлеб сей, и чашю сию пиете, смерть Господню возвещаете, дондеже убо приидет. на спасение же наше сам Спаситель научает [Иоан. глава 6]: ядыи Мою плоть, и пияи Мою кровь, имать живот вечныи и Аз воскрешю его в последнии день: плоть бо моя истинно есть брашно, и кровь Моя истинно есть пиво.

Вопрос. Что или како имам соблюдати в сей тайне?
Ответ. Первее егда священник имать совершати святую литургию, с намерением ума да совершает ю, еже святая церковь соборне убо описала своим, и несоборне [Вас. Вел. и Злат. и Иаков в литургии; Дионис. о церков. священнонач. глава 3]. ктому же да имать приналежащую вещь совершеную сущу и целу, еже есть, хлеб чистыи пшеничныи квасныи. и вино естественное с водою мало смешаное. потом и иныя потребы, без нихже никакоже может святая литургия совершитися. якоже о том достаточно имамы на руку в служебниках церковных, или в потребниках.

Вопрос. Како освящается сия тайна в святей литургии?
Ответ. Силою Господних словес, ихже на тайней вечери учеником рек [Матф. глава 26; Вас. Вел. и Злат. в литург.; Дамаск. книга 4 глава 14, той же в слове к Захарии]: се есть тело Мое, и се есть кровь Моя, егда сия словеса священником изглаголются над предложенным на престоле хлебом и вином, Дух Святыи невидимо приходит: призывания ради священническаго, и прилежаниа и существо хлеба и вина пресуществляется в существо тела и крове Христовы, и бывают точию самыя виды хлеба и вина.

Вопрос. Чим разньствует сия тайна от других?
Ответ. Тем, яко сия тайна не точию в причащении по освящении тайною бывает, якоже прочия тайны: но и в самом освящении бывши тайною и жертвою за живыя и без причащения доколе виды хлеба, и вина целыя пребывают, совершеным всегда есть тела и крове Христовы тайною, и самым Христом Богом нашим: ихже ради вин ни едина иная тайна того имать, якоже та имать. понеже яко самому Богу, поклонение и честь воздатися имать от нас.

Вопрос. Которым образом сия тайна разуметися имать?
Ответ. Аще кто восхощет причаститися тела и крове Господни, первее да имать, по описанному церковному чину с постом, и благоговением особным приготовити себе, потом исповедатися достойне, пред священником православным, и разрешение восприяти. такоже дабы никтоже в гневе не был. прочее егда кто к пресвятым тайнам приступает, подобает ему имети совершенную веру, яко истиннаго сущаго тела и крове Христовы причащается, имже преже да имать и с совестию опасно разсмотритися: по словеси святаго апостола Павла [1 кор. глава 11], да искушает же человек себе, и тако от хлеба да яст, и от чаши да пиет. ядяи бо и пия недостойне, суд себе яст и пиет не разсуждая тела Господня.

Вопрос. Разумеется ли сия святая тайна в равенстве, под двема виды, якоже духовным, рекше священником, тако и мирским?
Ответ. Тако воистину, а не инако. понеже и предание Христово таково а не инако есть, идеже глаголет [Мф 25]: прием Iсус хлеб и благослови, преломи, даяше учеником, и рече: приимите и ядите, се есть тело Мое. и прием чашю, хвалу воздав, даст им глаголя: пиити от нея вси, се бо есть кровь Моя новаго завета. яже за многия изливаема, во оставление грехов. тем ктому разумеется сице [Злат. на псал. 22 и 116], якоже в виде хлеба, телу Господню причащаемся, подобает убо всячески в виде вина, и крове Господни причащатися, аще восхощем известно себе спасение приобрести [Дамаск. книга 4 глава 14], яже аще и коснулобыся умышлении человеческих и неверие на се яко вещи те сумнителны ко спасению суть, пачеже ни единаго известного такова самодетеля и перваго содейственника иного имут на сию тайну изобрести, якоже есть Христос Господь: иже и заповеда на вечери ко апостолом, во онех словесех сице глаголя [Лука глава 22]: сие творите в Мое воспоминание.

Вопрос. Кая полза освящения же и причащения сея тайны?
Ответ. Первая полза во освящении [Злат. быт. поменек.], якоже есть за живых жертвою безкровною отпущения ради грехов, тако и за умерших вторая в причащении, яко Христос в нас живет и мы в Нем, по реченному [Иоан. глава 6], ядыи Мою плоть и пияи Мою кровь во Мне пребывает и Аз в нем. Третьяя полза. живот вечныи наследуем: якоже таможе святое писание свидетельствует, и ядыи Мя, и той жив будет Мене ради. там же ниже. ядыи хлеб сей, жив будет вовеки. Четвертая полза, яко свободни бываем от бесовских искушении, понеже егда ощутит в нас живуща Христа, не имать наветовати на нас: якоже о сем пространно и в Катехизме великом обрящеши: зде же точию подобает ведати яко да всякии человек христианин святую литоргию частее и з болшим благоговением слушал и тела и крове Господни причастник был [Злат. 1 Тим. глава 4].

Вопрос. Которая есть четвертая тайна?
Ответ. Священство уставленое от Христа во апостолех [о священстве Злат.]. ихже возложением рук на епископах, от епископов же на священниках, яже освящени бывают чином церковным, на строение святых таин, и на преподавание спасительнаго учения Христова, ибо и Господь вообразуя та два чина во оных словесех сице глаголя [Матф. глава 28]: шедше научите вся языки, крестяще я во имя Отца и Сына и Святаго Духа: якоже и апостол Павел тоже свидетельствует сице глаголя [1 кор. глава 4]: тако нас да непщует человек, якоже слуги Христовы, и строителя тайнам Божиим. таяже два чина в священстве, и иныя меншия в себе замыкают: тако убо потреба ведати, яко ни един на священство неруковозложенныи и ни таин строителем быти не может, разве некоторых нужных случаев таин, ниже учения Христова подавати в церкви от омбона, по реченному [2 Тим. глава 1]: еяже ради вины воспоминаю тебе, возгревати дар Божии, живущии в тебе, возложением руку моею. несть бо нам дал Бог дух страха, но силы и любве и целомудрия. руковозложение же силы никтоже имать, точию епископове.

Вопрос. Что еще ино разумеется в тайне священства?
Ответ. Разуметися имать сие, подобает имети освященному на сию тайну некая подобающая свойства: Первее яко дабы был целым и здравым телом, еже бы было без споны к служению, и летами бы якоже правила повелевают. Второе, дабы умел ведение належащее тому чину. Третие же, дабы и совесть ему в чем не препинала.

Вопрос. Кая есть вещь, или образ тайны священьства?
Ответ. Вещь  есть возложение рук епископских на главе, приемлющаго священство. совершение же, учиненая тому молитва, юже епископ единою с возложением рук, над главою освящающагося глаголет: еже есть божественая благодать, и прочая.

Вопрос. Кая дела суть сея тайны?
Ответ. Якоже и выше не единою поведася, яко строити тайнами Господними, и учити святому евангелию?

Вопрос. Есть ли яковыя чины пред тою тайною?
Ответ. Есть: о нихже добре сами епископове и священници ведают, и при освящении бывают оглашены егда орудия всякому чину належащия бывают предаваны.

Вопрос. Которая есть пятая тайна?
Ответ. Покаяние, еже за грехи бывает с сокрушением сердечным во исповедании грехов, с надежею о отпущении, ради и излиания честныя крове Сына Божия, и то разрешением священническим, имже сила дана есть от Христа вязати же и решити [Афан. о воплощ. Бога; слово Злат. евреем глава 12 бес. 31].

Вопрос. Како или что подобает разумети в сей тайне?
Ответ. Первее кающемуся подобает быти христианином православно верующим. понеже без благия веры, ни единое же покаяние быти может. Второе, разрешити кающагося никтоже может, точию православныи священник, понеже кроме церкви несть спасения и разрешения. Третьее которыи к покаянию приступает, подобает ему имети сетование и сокрушение сердечное, за тыя грехи, ими же ко Господу Богу и ближнему приразися. Четвертое: яко да имать вся своя грехи ихже кается исповедати: понеже не имать его разрешити от того, о чем не ведает священник якоже о том много свидетельств во святом писании обрящеши: а наипервее в деяниих апостолских [Деян. глава 19]: мнози же от веровавших прихождаху исповедающе, и сказующе дела своя. такоже и ко Иоанну Крестителю вси приходящии исповедовали грехи своя: якоже Марко евангелист свидетельствует [Мар. глава 1]: и исхождаше к нему вся иудейская страна и иеросалимляне и крещахуся вси во Иордане реце от него, исповедающе грехи своя: к сему и заповедь апостольская послушествует сице глаголющи [Иаков.]: исповедайте убо друг другу согрешения. исповедатися убо никомуже иному имамы, точию пред теми, иже имут силу разрешити, и с ведением нам совещати.

Вопрос. Како бывает разрешение грехов от духовнаго отца?
Ответ. По слышании исповеди от кающагося священник добрее разсудивши истинное его исповедание сокрушение же сердечное и предложение и устроение, ко целомудрению, такоже и произволение соблюдатися от грехов, разрешает его по достоиньству покаяния от грех, в нихже имать разрешити или удержати. разрешая же его в молитвах своих и употребляет сими словесы глаголя, аз данною мне властию от Христа разрешаю тя, во имя Отца и Сына и Святаго Духа: имиже творит его приятна телу и крови Господни, яко и на судном дни не имать быти осужен по реченному: аминь аминь глаголю вам, елика аще свяжете на земли, будут связана на небеси: и елика аще разрешите на земли, будут разрешена и на небеси.

Вопрос. Кая дела сея тайны?
Ответ. Явныя дела суть [Злат. на псал. 142 бес. 5 о покаян.], яко человек избыв греха приобретает себе якобы второе безгрешие, и от сына гнева и неблагодати, бывает сыном благодати Божия, егда доволно за грехи исправит каяся, по заповеди и учению духовнаго отца.

Вопрос. Которая есть шестая тайна?
Ответ. Устроение брака, иже бывает общим изволением от тех, иже входят в то достояние без всякия пакости, и благословением священническим [Злат. на енес. бес. 56]: егда себе обручают взаемно, веру честь, и любовь брачную соблюсти молитвою и благословением утвержено есть, и тайною именуется по реченному [ефес. глава 5]: тайна сия велика есть. таковое устроение брака и писание святое похваляет [евреем глава 13]: честен брак и ложе нескверно.

Вопрос. Что или какия суть ползы сея тайны?
Ответ. Первая польза есть [Злат. книга 1 о девстве], яко иже чистоты девства соблюдати не могут, то брака ради и всяко блудодеяния убегают, по реченному [1 кор. глава 7], обаче блудодеяния ради кождо свою жену да имать, и каяждо жена своего мужа да имать. Другая полза яко рождьшиися дети от брака, не токмо честными глаголются, но и святыми суть. Третьяя полза яко во всяких случаех и немощех, наипаче муж жене, и жена мужеви ближайшим суть, якоже святое писание учит [Мар. глава 10]: от зачала созданиа, мужа и жену сотворил я есть Бог: сего ради оставит человек отца своего и матерь, и прилепится к жене своей, и будут оба в плоть едину. Четвертая полза, яко в устроении брака, по образу его живущии, ни единыя хулы от Бога и от человек приимут, ниже в совести скрупулу [обличение].

Вопрос. Кии конец брака есть?
Ответ. Конец есть сему браку, чтобы человеческиии род умножался и число бы назнаменованных и избранных в царство небесное исполнилося [Быт 1].

Вопрос. Которая есть седмая тайна?
Ответ. Помазание елеом с молитвою в немощи, отпущениа ради грехов, и здравия ради телеснаго [Вас. ко Амфил. глава 27 о Святом Дусе], якоже писание святое учит [Мар. глава 6]: бесы многи исцеляху, и мазаху маслом многи недужны, и исцелеваху. И инде [Иак 5]: болит ли кто в вас, да призовет попы церковныя, и да молитву сотворят над ним, помазавше его маслом во имя Господне, и молитва веры спасет болящаго. и аще грехи будет сотворил, отпустятся ему.

Вопрос. Како или что разумеется в сей тайне?
Ответ. Первее дабы священници православныя веры были [собор Карф.]. Второе, дабы вещь належащая была еже есть масло, которое первоосвященно бывает от коего любо священника. Третие, дабы немощныи был, такоже православныя веры: и дабы прежде помазания маслом исповедался. Четвертое, дабы молитва яже внегда помазуем бывает болящии глаголема была над ним, в нейже образ сея тайны воображается, рекше. Отче святыи врачю душям и телом, и прочая.

Вопрос. Кии успех или полза есть тайны сея?
Ответ. якоже выше указася от святаго Иакова, тако и ныне глаголю, яко отпущение бывает грехов, и исцеление телу [1 кор. глава 11].

Вопрос. Которыи есть един надесятыи артикул?
Ответ. Чаю воскресения мертвых.

Вопрос. Многим ли вещем научает сей артикул?
Ответ. Трем: Первей, яко известно и непременно имать быти из мертвых востание человеческим телесем, якоже благих, тако и злых, по реченному [Иоан. глава 5], не дивитеся сему яко грядет час, воньже вси сущии во гробех услышат глас Сына Божия, и изыдут сотворшии благая в воскрешение живота: а сотворшии злая в воскрешение суда.

Вопрос. Чесому второму научает сей артикул?
Ответ. Учит якоже в сем сущем теле, в нем же живем в мире сем, в том и из мертвых востати имамы [Дамаск. книга 4 глава 28]: обаче уже то тело безсмертно будет, по реченному от апостола [1 кор. глава 15], подобает бо тлеемому сему облещися в нетление, и смертному сему облещися в безсмертие.

Вопрос. Чесому третиему научает сей артикул?
Ответ. Учит, яко всякая душа к своему сущему телу обращена имать быти. и с ним вкупе или мзду или мучение вечное восприимет совершенно. прочее же тако подобает веровати о всех святых, по словеси святаго Иоанна Златоуста [Злат. евреем глава 11 бес. 28]: кроме Пресвятыя Богородицы. которая уже есть и с душею и с телом на небо взята.

Вопрос. Чесого еще научюся от того артикула?
Ответ. Научишися воспоминати всегда во уме, 4, вещи: яже суть, смерть, страшныи суд, мука вечная, и царство небесное [Еклезиаст]. яко да размышляя о том готов бы был на смерть, и на страшном суде не осужден, и в муку не ввержен, но в царстве небесном могл быти.

Вопрос. Которыи есть дванадесятыи артикул веры?
Ответ. И жизни будущаго века, аминь [Иуда стих 24].

Вопрос. Чесому научает сей артикул?
Ответ. Научает [Злат. к Феофил. глав. в лис. 5], яко вернии и избраннии Божии в будущем веце наследовати имут в царстве небесном вечныи живот, утешение же и радость неизреченную, якоже святое писание учит [1 кор. глава 5]: ихже око не виде, и ухо не слыша и на сердце человеку не взыде, яже уготова Бог любящым Его. и инде [1 кор. глава 13]: видим убо ныне якоже зерцалом в гаданиих, тогда же лицем к лицу, ныне разумею отчасти, тогда же познаю якоже и познан бых.

Вопрос. Что или кое утешение в царстве небесном?
Ответ.. Ни едино тамо утешение телесное и временное будет, по апостольскому речению. несть бо царство Божие брашно и питие, но правда и мир и радость о Дусе Святе [рим. глава 14]. и инде [Мф 24]: в воскресение бо ни женятся ни посягают но яко ангели Божии на небеси суть. таковое же утешение и радость не имать конца в царстве небесном.

Вопрос. Тожде ли утешение будет имети душа и тело, или ни?
Ответ. Душа яже вкупе с телом в настоящем житии благоугоди Богу, купно с телом и в будущем веце прославитися имать. славою же подобни ангелом будут, и просветятся яко солнце по реченному [Матф. глава 13]: тогда праведници просветятся яко солнце в царствии Отца их. зачим и едино утешение и радость купно и неразделно восприимут, аминь.

Вопрос. О осужденых же како имам разумети?
Ответ. И тии такоже купно с душею и телом въвержени будут во огнь вечныи, и тамо вовеки имут мучитися, по реченному Христом [Матф. глава 25]: идите от Мене проклятии во огнь вечныи уготованныи диаволу, и аггелом его. и инде [Мар. 9]: идеже червь их не умирает, и огнь не угасает.

Вопрос. Будут ли имети конец себе осужденнии муками теми?
Ответ. Никакоже [Феофил. на Матф. глава 25]: якоже бо иже на небеси суть вовеки нетленными суще, радости и утешения наслаждатися будут. тако и тии иже во аде суще, вовеки с душею и телом во огни без конца мучитися будут, и никогдаже съгорети имут.

Другая часть о надежи

Вопрос. Что есть надежда?
Ответ. Надежда есть истинное и несмущенное дерзновение, в Господе Бозе еже веровати, яко съпоспешением Его получити имамы спасение вечное [Вас. Вел. слово о подвиз.]. и о всех тех вещех, о нихже Господа Бога с верою сгожающеся [соединяющеся] по воли Его святей да просим якоже писание святое учит [евреом глава 10]: не отложите убо надежди вашея, яже имать мздовоздаяние великое. и инде [рим. глава 8]: упованием бо спасохомся. упование же видимо, несть упование. еже бо видит кто, что им уповает.

Вопрос. В чем належит надежда наша?
Ответ. Надеждею нашею есть сам Господь Iсус Христос, якоже святыи апостол Павел научает, сице глаголя [1 Тим. глава 1], Павел посланник Iсус Христов, по повелению Бога Спаса нашего и Господа Iсуса Христа, упования нашего, и то в лепоту есть: понеже в Нем и Им живот вечныи, и всякая благодать даема бывает, якоже и писание святое сице глаголет [Иуда ст. 20]: вы же возлюбленнии, святою вашею верою, назидающе себе Духом Святым и молящеся, сами себе в любви Божии соблюдайте, ждуще милости Господа нашего Iсуса Христа в жизнь вечную.

Вопрос. Что в надежди разумеется?
Ответ. Две вещи разумеются, молитва Господня и блаженьства.

Вопрос. Что есть молитва?
Ответ. Молитва есть прошение с простотою от веры ко Господу Богу, с надежею содержания Егоже просим, или прославляем, и благодарим.

Вопрос. На много ли частей молитвы делятся?
Ответ. На три: первая часть, еюже Господа Бога прославляем, величества Его ради и славы. Вторая часть, егда о чем Господа Бога просим. Третия часть есть, егда за прешедшая благодеяния Оного благодарствуем.

Вопрос. Которая есть молитва известнейшая, и изряднейшая?
Ответ. Молитва Господня, ейже сам Iсус Христос научи апостолы своя, и тако заповеда молитися глаголя, вы же сице молитеся, Отче наш иже еси, и прочая [Матф. глава 6].

Вопрос. На много ли частей делится та молитва Господня?
Ответ. На три части [Феофил. на Матф. глава 6]: первое есть предисловие, в нем же воображается к кому имам молитися. Другая часть, в ней же воображается дело, о котором просим или молим. Третия часть есть, замкнение молитвы Господни, в ней же извещение есть, яко о чесом есмы просили, получити имамы то, силою и помощию Бога.

Вопрос. Которое есть предисловие молитвы Господни?
Ответ. Сие есть Отче наш иже еси на небесех.

Вопрос. Чесому научаюся от того предисловия?
Ответ. Первее познаеши, яко егда приступаеши Господу Богу молитися, тогда имаши быти в добром уготовании, мысли же и сердца, такоже и совести, дабы тебе та молитва пред Ним приятна была. потом себе познаем, яко сынове есмы Отца небеснаго по благодати. тем и просяще велико дерзновение к Нему имети имамы. а яко есмы сынове Божии, писание святое научает. елици же прияша Его, даст им область чадом Божиим быти, верующим во имя Его [Иоан. глава 1]. и инде [гал. глава 4]: да якоже есте сынове. посла Бог Духа Сына своего в сердца ваша, вопиюща авво Отче.

Вопрос. Чесого еще от того научаюся?
Ответ. Научаемся, яко вси имамы единаго Отца, иже нас ради, яко детей своих ради, все готов сыи сотворити, якоже глаголет Христос [Матф. глава 6]: весть бо Отец ваш небесныи, яко требуете сих всех. и инде [Матф. глава 23]: не зовите себе отца на земли, един бо есть Отец ваш иже на небесех.

Вопрос. Чесого болше научает то предисловие?
Ответ. Учит того, дабы есмы единаго Отца имуще, вси вернии и избраннии Божии, исповедовали себе быти братиею, и друг за друга молилися по писанию [Иаков глава 5], молитися друг за друга, яко да исцелеете.

Вопрос. Како имам о сем словеси разумети, еже на небесех?
Ответ. Господь убо и Бог не точию на небеси, но и везде сыи, и все исполняет. обаче особным образом и с болшею благодатию, на небеси пребывает, и тамо престол свой имать, якоже во псалмех глаголет [псалом 102]: Господь на небеси уготова престол свой, и царство Его всеми обладает.

Вопрос. В другой части молитвы много ли прошений есть?
Ответ. Седмь: Первое, да святится имя Твое.

Вопрос. Что в себе заключает то прошение?
Ответ. первее просим и молим Господа Бога дабы дал нам житие в благочестии препровождати, еже по воли Его и по благоволению жительствовати: им же бы имя Его святое прославляемо было, якоже сам научает [Матф. глава 5; Злат. на Матф. глава 6 бес. 20; Феофил. там же]: тако да просветится свет ваш пред человеки, яко да видят вашя добрая дела, и прославят Отца вашего, иже есть на небесех.

Вопрос. Чесому второму имам научитися от того прошения?
Ответ. Научишися сему [Нис. в слове 8 о мол. Господни], яко да ни единыя злобы сотвориши когда, такоже и прелести, имже бы имя Божие похулено было: яко да не будет речено и о тебе сице [рим. глава 2]: имя бо Божие вами хулится во языцех. и инде [2 тит. глава 3]: имуще образ благочестия, силы же его отвергшеся.

Вопрос. Которое есть второе прошение?
Ответ. Да приидет царствие Твое.

Вопрос. Что заключает в себе то прошение?
Ответ. Первее просим и молим, дабы в сердцы нашем пришед Господь Бог жительствовал благодатию и милостию своею, зачим имети нам правда, мир, и радость, а грех бы ктому не царствовал в сердцы нашем и теле, по апостольску учению [рим. глава 6]: да не царствует убо грех в мертвенем вашем теле, во еже послушати его в похотех его, ниже представляйте уды ваша оружия неправды греху, но представляйте себе Богови, яко от мертвых живы, и уды ваша оружия правды Богови.

Вопрос. Что второе замыкается в том прошении?
Ответ. Исповедуется се: дабы нам имеючи добру совесть, усердно Господа Бога молити, яко да даст нам христианьски разлучитися от телесе, и быти с собою всегда, якоже и апостол Павел глаголет о себе [филип. 1]: желание имыи разрешитися и со Христом быти много паче лучше. такоже просим, яко да и число избранных Божиих исполнится, и скорейше пришествие Христово быти могло, и воскресение мертвых. и дабы неприятель душ наших ктому уже в мире сем не царствовал, но Бог бы был во всех [кор. глава 15].

Вопрос. Которое есть третие прошение?
Ответ. Да будет воля Твоя, яко на небеси и на земли.

Вопрос. Что заключается в том прошении?
Ответ. В сем прошении первее просим Господа Бога [Феофил. на Матф. глава 5], дабы дал нам познати волю свою святую, яже есть воображена к заповедех Его святых и во всем учении Христа Господа, во евангелии описанном. познавшим же нам волю Его исполняти бы помощию Его, по силе нашей, якоже сам Христос научает [Иоан. глава 14]: имеяи заповеди Моя и соблюдая их, той есть любяи Мя. а любяи Мя возлюблен будет Отцем Моим, и Аз возлюблю его, и явлюся ему сам.

Вопрос. Чесому второму научитися имам от того прошениа?
Ответ. В том прошении просим Господа Бога, дабы якоже на небеси ангели исполняючи волю Божию во всем соединителне Его славят, сице бы и христиане на земли, в любви и соединении единеми усты, и единем сердцем Господа Бога прославляючи, волю Его святую исполняли: о чесом на всякии день и православная церковь Господа Бога просит.

Вопрос. Которое есть четвертое прошение?
Ответ. Хлеб наш насущныи даждь нам днесь.

Вопрос. Что заключается в сем прошении?
Ответ. В сем прошении первее просим и молим Господа Бога, дабы дал нам того хлеба, имже душа человеческая живет, рекше слышание слова Божия: о немже сам Христос тако глаголет [Матф. глава 4; Нис. слово 4 о молит. Господни; Злат. и Феофил. на мес. поменен.]: не о хлебе едином жив будет человек, но о всяком глаголе исходящем из уст Божиих. Потом просим о другом хлебе, имже душа живет, дабы есмы достойне тела и крове Христовы причащатися имели, на вечное наше спасение. таковым хлебом самого себе называет Спаситель наш Христос [Иоан. глава 6]: Аз есмь хлеб животныи, иже сшедыи с небесе. аще кто снесть от хлеба сего жив будет вовеки. и хлеб егоже аз дам плоть Моя есть, юже Аз дах за живот мира.

Вопрос. Чесому еще от того прошения научитися имам?
Ответ. Просим убо и о сем временном хлебе, дабы его нам дал в мире наслаждатися: а при хлебе и о всяких иных потребах без них же человек не может жити, обаче не преизлише. словом же днесь, отдаляет излишнее попечение о временных вещех будущих: якоже на ином месте научает сице глаголя [Матф. глава 6]: не пецитеся убо на утреи, утреннии бо собою печется: довлеет дневи злоба его.

Вопрос. Которое есть пятое прошение?
Ответ. И остави нам долги наша, якоже и мы оставляем должником нашим.

Вопрос. Что имеет в себе то прошение?
Ответ. Первее в сем прошении просим [Нис. о мол. Господни слово 5], дабы вся грехи яже есмы по святом крещении сотворихом отпустил нам Бог, якоже и мы отпущаем должником нашим: по глаголющему словеси от Христа [Матф. глава 6]: аще бо отпущаете человеком согрешение их, отпустит и вам Отец ваш небесныи. аще ли не отпущаете человеком согрешения их, ни Отец ваш отпустит вам согрешении ваших.

Вопрос. Которое есть шестое прошение?
Ответ. И не введи нас во искушение.

Вопрос. Что заключается в том прошении?
Ответ. Первее в сем прошении просим Господа [Нис. о мол. Господни, слово 5], дабы вовремя егда неприятель на нас воюет, похотьми телесными и мирскими, неотступно благодатию своею святою нам помогал: понеже без Него ничесоже можем творити. якоже сам глаголет [Иоан. глава 15]: яко без Мене не можете творити ничесоже. немощи бо ради нашея сила Христова прославляема бывает, якоже ко апостолу Павлу рекл [2 кор. глава 12]: довлеет ти благодать Моя, сила бо Моя в немощи совершается.

Вопрос. Очесом второе в сем прошении Господа Бога просим?
Ответ. Просим [Феофил. глава 6 на Матф.], яко да всем врагом и гонителем церкве Христовы сердца смирити, и избавит нас от гонителей, и от злокозньства их от диявола умышленаго. аще ли когда и случится впасти во искушения, то дабы паче силы нашея не попущал нам искуситися по реченному [1 кор. глава 10]: силен же Бог иже не оставит вас искуситися, паче еже можете, но сотворит со искушением и избытие, яко возмощи вам понести.

Вопрос. Которое есть седмое прошение?
Ответ. Но избави нас от лукаваго.

Вопрос. Что замыкается в том прошении?
Ответ. В сем прошении просим и молим Господа Бога [Злат. на Матф. глава 6 бес. 12; Нис. о мол. Господни слово 5], дабы нас от сатаны защищал, которыи всякому злу есть начинатель, собою же и злыми человеки. зде же просим дабы дал нам исправление житию, и престати от грехов: и удалил от нас за грехи уготованное нам мучение, временное же и вечное.

Вопрос. Которая есть третия часть молитвы Господни?
Ответ. Замыкание: яко Твое есть царство и сила и слава, вовеки, аминь.

Вопрос. Что заключается в тех словах?
Ответ. Тыя слова глаголати в конце сея молитвы сам Христос научил в Матфеи евангелисте [Злат. на Матф. глава 6, бес. 15], яже заключают в себе извещение сицевое: яко аще что просим по воли Божии, то все сотворити нам возможет Он: понеже сила и господьство Его во всем мире есть: и то не тако нас деля грешных человек, якоже славы своея ради святыя. сего ради извещаемся от сего по воли Его святой просити, якоже Иоанн святыи научает нас сице глаголя [1 Иоан. глава 5]: и се есть дерзновение еже имамы к Нему, яко аще что просим по воли Его, послушает нас. Аминь же полагается на концы ради того же извещения, яко тако, а не инако есть.

Вопрос. Много ли есть блаженств?
Ответ. Христос в Матфеи евангелисте девять блаженств изчисляет [Матф. глава 5], якоже и Златоуст глаголет [Злат. на Матф. глава 5 бес. 15; Феофил. там же], Моисей в правде десять заповедей даде, Iсус же Господь Моисеов девять блаженств.

Вопрос. Которое есть первое блаженство?
Ответ. Блажени нищии духом, яко тех есть царство небесное [Той же Злат. на 1 кор. глава 15; Злат. на Матф. глава 5 бес. 15].

Вопрос. Чего имам научитися в том блаженстве?
Ответ. Научишися сему, яко нищета доброволная, яже от произволения человеческаго сердца обретаемая воистину человека сотворит убогим и блаженным, то бо есть болше и богатьства. понеже и богатьства ничтоже сему препинают к любви к Богу и ближнему: якоже творили первии христиане: иже имения своя продающе, и пред ногама апостольскима полагали сребро на строение убогим и неимущим братии [Деян. глава 4]: и ни един же от имения своего глаголаше свое быти, но бяху им вся обща.

Вопрос. Которое есть второе блаженство?
Ответ. Блажени плачющии, яко тии утешатся.

Вопрос. Чего имам научитися в том блаженстве?
Ответ. Научишися сему: яко тии поистине плачюще, иже пребывающе в мире сем, за грехи своя, и ближняго плачют. такоже плачют и тии иже обиды приемлют от силнейших: якоже вдовы, сироты, и убозии человеци, и неведующии о себе совестити [Злат. на Матф. глава 5 бес. 15; Феофил. там же; Нис. в слове 3 о блаженных]. плачющиижеся, и сетующии в работе у поганых, и терпящии гонение веры ради христианския: иже убо в мире сем блаженными суть, утешение имуще духовное: во оном же веце, истинное на небеси будут имети.

Вопрос. Которое есть третие блаженство?
Ответ. Блажени кротции, яко тии наследят землю.

Вопрос. Чего имам научитися в том блаженстве?
Ответ. Научишися [Нис. в слове 12 о блажен.], яко тии кротци суть, иже смиренно мудрствующе о себе, и не высящеся над другими, естеством тела, имением, хитростию, и житием: но о всем в себе всегда словеса Христова глаголюще, егда сотворите вся повеленная вам, глаголите, яко раби непотребни есмы, яко еже должни бехом сотворити, сотворихом.

Вопрос. Которое есть четвертое блаженство?
Ответ. Блажени алчющии и жаждущии правды, яко тии насытятся.

Вопрос. Чего имам научитися в том блаженстве?
Ответ. Научишися, яко тии суть влепоту блажени, яже по достоинству правду творящии. такоже и тии блажени суть ихже неправедно осуждают и порицают егда они благодарне то терпяще Бога ради приемлют. зде же имут научитися судии и властели, дабы правду всякому творили, аще хотят быти блаженными. воспоминающе псаломская словеса [псалом 9]: суди сиру и смирену, да не приложит потом величатися человек на земли. Такоже не имут погубити надежди и тии, иже алчют всегда правды, и не могут получити, ведуще пророческая словеса [псалом 9]: яко не доконца забвен будет нищии, и терпение убогих не погибнет доконца: но видяще лице Божие, насыщени будут правды, внегда явится им слава Его.

Вопрос. Которое есть пятое блаженство?
Ответ. Блажени милостивии яко тии помиловани будут.

Вопрос. Которыя суть дела милости?
Ответ. Дела милости сугубы суть, едины телесныя, а другия душевныя [Феофил. на Матф. глава 25].

Вопрос. Которыя суть дела милости телесныя?
Ответ. Седмь: ихже сам Христос изчисляти будет на судном дни [Матф. глава 25]: алчющаго накормити жаднаго напоити: нагаго одеяти: в темници суща посетити и утешити, немощнаго посетити, и советовати ему, еже к спасению ему належит, и к здравию телесному. странна суща, или того иже где не имать главы своея подклонити, в дом свой прияти, и построити его по силе своей, а его кондиции [исправлению] . к темже шестим добродетелем и се надлежит, еже благодарне приимати в домы своя тех иже в путь шествующих обещавшихся на святая места, не оставляюще к сему и того еже бы убогим и неимущим, и бедным немощным, на осуждение наше по улицах лежати. но приимати их в домы своя, и служити им спасения ради души своея. Седмое же дело милости, писание святое нам в Товии заповедует, умершаго погребсти, наипаче же тех, иже не оставиша ничтоже по себе, чим бы тело их погребсти, а при погребении просити и молити Господа Бога, за отпущение грехов душам их. тако бо и ангел Рафаил к Товии глагола [Товия глава 12], когда молился еси со слезами, и погребал еси мертвыя, и оставль обед свой, мертва скры в день в дому твоем, а в нощи погребе его, аз принесох молитву твою Господу Богу.

Вопрос. Которая суть дела милости, належащия души?
Ответ. Тая же седмь: первое убо есть человека согрешающаго от греха отвести, якоже святое писание учит [Иак 5]: братие аще кто в вас заблудит от пути истины, и обратит кто его, да весть, яко обративыи грешника от заблужения пути его, и спасет душю от смерти, и покрыет множество грехов.

Вопрос. Которое есть второе дело милости душевныя?
Ответ. Неведущаго научити, первое воли и закону Божию, како имать жительствовати по христиански. потом како молитися Богу. Третие, еже любо что к доброму житию належит, а ты что умееши, ближняго своего без зависти научай, да не будеши осужден якоже иже и приемыи един талант [Матф. глава 25].

Вопрос. Которое третие дело милости душевныя?
Ответ. Требущему совета, подати здравыи совет, якоже от заблужения к правому пути. сице и ко всем добродетелем: якоже и выше речеся о сем, идеже о дарех Духа Святаго, учение бысть.

Вопрос. Которое есть четвертое дело милости душевныя?
Ответ. Господа Бога просити и молити, за всех иже во власти суть, и за желающих благодать и милость Божию получити: якоже пространнее имаши о сем обрести, и в заповедех церковных.

Вопрос. Которое есть пятое дело, милости душевныя?
Ответ. Сетующаго, или скорбящаго утешити, не точию словом добрым, но и делом.

Вопрос. Которое есть шестое дело, милости душевныя?
Ответ. Не попущати творити обид, такоже и правоверующих прельщатися от еретик, но всяко тщатися о взыскании и о навращении всякого, иже не есть в вере православней.

Вопрос. Которое есть седмое дело, милости душевныя?
Ответ. Обиды, яже аще от кого любо яковым образом наносимыя нам, с радостию терпети, и презирати я, яко да Господь Бог грехи нашя презрит. сия же вся дела милости подобает нам, с великим прилежанием и усердием совершати, болшия ради мзды от Бога.

Вопрос. Которое есть шестое блаженство?
Ответ. Блажени чистии сердцем, яко тии Бога узрят.

Вопрос. Чего научитися имам в том блаженстве?
Ответ. Блажени суть тии, иже во всех добродетелех чистоту соблюдают, не точию телесную, но и сердечную, рекше ниже помыслом подвизающеся на всякую нечистоту: еюже и брак соблюдается [Феофил. на Матф. глава 5; Нис. слово 5 о блажен.].

Вопрос. Которое есть седмое блаженство?
Ответ. Блажени миротворци, яко тии сынове Божии нарекутся.

Вопрос. Чего научитися имам в сем блаженстве?
Ответ. Первее сего блаженъства причастници суть священници, иже жертвою безъкровною Бога к человеком примиряюще. тако же и мирстии благочестивии, иже молитвами своими милостива Бога сотворяюще ходатайствующе о ближних, к сему блажени суть и тии, иже межи людьми мир творящии: егда заступающе ходатйствуют, дабы въсуе кровь христианская не проливалася.

Вопрос. Которое есть осмое блаженство?
Ответ. Блажени изгнани правды ради, яко тех есть царство небесное.

Вопрос. Чего имам научитися в сем блаженстве?
Ответ. В том блаженстве заключаются вси иже правду глаголюще, от людей приемлют гонение, якоже суть, учители, судии, и властели, егда правду глаголати имут, на нюже от человек злобу претерпят.

Вопрос. Которое есть 9 блаженьство?
Ответ. Блажени есте егда поносят вам, и изженут и рекут всяк зол глагол на вы, лжуще мене ради. радуйтеся и веселитеся, яко мзда ваша многа есть на небесех.

Вопрос. Чего научитися имам в сем блаженстве?
Ответ. Сие блаженство ключается единем мучеником, и ко всем тем иже гонение терпят, егда им кто благочестие заграждает, церкви же и имение и волю отъемлет, от чинов и из градов изгоняет: иногда же неции веры ради и смерти предают.

Третия часть, о любви к Богу, и ближнему

Вопрос. Кая наука есть третией части?
Ответ. Есть наука о любви к Богу и ближнему на тех бо двоих заповедех весь закон основан есть [Злат. на псал. 140], якоже научает Христос сице глаголя [Матф. глава 22]: в сею обою заповедию, весь закон и пророци висят.

Вопрос. На которых заповедех любовь к Богу и ближнему созидается?
Ответ. В заповедех от Бога Моисеом преданых на дву скрижалех. На первой скрижали суть четыри заповеди Божия, яже научают како имамы любити Господа Бога своего, и соблюдатися к Нему. На другой скрижали суть шесть заповедей, яже научают како имам любити ближняго своего яко себе, и соблюдатися к нему.

Вопрос. Что или како разумети в тех заповедех?
Ответ. Первее имаши разумети, яко заповеди едины суть яже заповедуют добре творити. а другия яже запрещают зле творити. и аще кто доброе творит, от злаго же соблюдается, таковыи заповеди Божия сохраняет.

Вопрос. Что бывает от того, егда кто исполняет заповеди Божия?
Ответ. Исполнение заповедей есть, плод веры христианскиа, по Спасителеву учению [Матф. глава 7]: от плод их познаете их. еда объемлют от терния грозды, или от репия смоквы. такоже и инде: о сем разумеют вси, яко Мои ученици есте аще любовь имате межю собою.

Вопрос. Что от того бывает, егда кто не соблюдает заповедей Божиих?
Ответ. Ражается от сего грех, а от греха смерть, по апостольскому речению [рим. глава 5]: сего ради, якоже единем человеком грех в мир вниде, и грехом смерть, и тако во вся человеки смерть вниде, онем же вси согрешиша.

Вопрос. Заповеди же суть Божия, христианскиа ли добродетели, или греху искушение?
Ответ. Тако есть воистину: зане же аще кто в заповедех Божиих всегда поучается, той добродетелно в мире живет. а иже о заповедех Божиих нерадит, той согрешает.

Вопрос. Которыя же суть первыя добродетели христианския?
Ответ. Первыя добродетели христианския суть три, без них же никтоже спасется. а нарицаются богословскими: рекше, вера, надежа, и любовь [1 кор. 13].

Вопрос. От тех добродетелей которыя иныя добродетели первее родятся?
Ответ. Другия три добродетели, благочестия христианскаго [Матф. глава 16]: молитва, и милостыня, о них же во своем месте сказася наука.

Вопрос. От тех паки добродетелей, которыя иныя еще добродетели исходят?
Ответ. Четыри добродетели роднейшии [Нис. на Екклезиас. бес. 6]: мудрость, правда, мужество, и целомудрие.

Вопрос. Како имам разумети о мудрости христианстей?
Ответ. Имаши ведати, яко мудрость есть христианская. познание воли Божии, еюже како в мире подобает жительствовати якоже святыи апостол Павел научает [ефес. глава 5]: не бывайте несмыслени, но разумевающе, что есть воля Божия. при сей мудрости разумеется истинная и нелицемерная целость, о ней же сам Христос глаголет [Матф. глава 10]: будите мудри яко змия, и цели яко голубие.

Вопрос. Како имам разумети о правде христианстей?
Ответ. Правда есть христинская, не токмо любящих любити, но аще кто и зло сотворит нам, не отмщавати: и не токмо не отмщавати, но и Бога молити должни есмы.

Вопрос. Како имам разумети о целомудрии?
Ответ. Целомудрие есть соблюдение меры по достоянию, во всех путех христианских, по апостольску учению [рим. глава 13]: яко во дне благообразно да ходим, не козлогласовании и пианствы, не любодеянии и студодеянии, не рвением и завистию. но облецитеся Господем нашим Iсус Христом, и плоти угодия не творите в похоти.

Вопрос. Како имам разумети о мужестве?
Ответ. О мужестве убо выше научихомся, идеже о дарех Духа Святаго речеся, и тамо чти.

Вопрос. Что есть грех?
Ответ. Грех ничтоже ино есть, разве преступление закона, и воли Божии: от него же раждается смерть [рим. глава 3].

Вопрос. На колико делится грех?
Ответ. Един грех смертныи, а другии повседеневныи, якоже научает святыи Иоанн Богослов [1 Иоан. глава 5]: есть грех к смерти, и есть грех не к смерти.

Вопрос. Что есть грех смертныи?
Ответ. Грех смертныи есть, преступление к Богу, или к ближнему своему: егоже ради отщетеваемся благодати Божия, и не каемся, и умираем в нем, вечно умираем: и того ради смертным он грехом называется.

Вопрос. На колико делятся смертныя грехи?
Ответ. На три части: в первой части суть грехи смертныя, тяжчайшыа [главнейшия]. в другой части, на Дух Святыи. в третией части грехи суть вопиющыя к Богу о мщении.

Вопрос. Много ли есть грехов смертных главнейших?
Ответ. Седмь: 1 чревообьядение. 2 блуд [студодеяние]. 3 сребролюбие. 4 гнев. 5 уныние. 6 тщеславие. 7 гордость.

Вопрос. Которыя суть грехи на Дух Святыи?
Ответ. Аще кто видя на себе излишнюю благодать Божию, дерзновенно сыи согрешает. второе, отчаяние милости Божии. третие, сопротивление, на явную и познанную правду [Быт. глава 4]. такожде творити свары между братиею.

Вопрос. Которыя суть грехи вопиющыя к Богу о мщении?
Ответ. Первое убийство волное: потом содомскии грех: третие, утеснение вдов и сирот: четвертое, удержание мзды наемничи [псалом 145, 36]. ктому прочее безчестие родителей и добродеев.

Вопрос. Что есть грех повседневныи?
Ответ. Есть преступление к воли и заповеди Божии. имже к Богу и ближнему на всяк день приражаемся: обаче благодати Божии не оставляет от нас: зане же скоро о нем разсмотряем, и каемся. а тех грехов без числа есть.

Вопрос. Может ли человек быти причастник чужих грехов?
Ответ. Может: егда кто могии кого от греха отвести, не отведет: тако же кто не накажет, имея силу к наказанию, глаголю же, господин раба, и подданнаго. отец сына, муж жену: и всякии начальствующии подначальствуемаго. тако же кто дает кому возбужение ко греху яковым любо образом, причастником есть греха того.

Вопрос. Которая есть первая Божия заповедь первыя скрижали?
Ответ. Сия есть [Исх 20]: Аз есмь Господь Бог твой, изведыи тя от земли египетския, от дому работнаго. да не будут тебе бози ини, разве Мене.

Вопрос. Како имам разумети о сей заповеди?
Ответ. Имаши разумети, яко Господь Бог творец сыи небу и земли, Егоже кроме несть иного, жидовскому языку обьявляя себе, и заповедуя, яко да иного бога не имеют, благодеяние сие пред лице им представляет, яко из работы египетския изведе их. мы же христиане не равным и единым образом, Того единаго Бога исповедати, и славити, и заповеди Его святыя соблюдати должни есмы, со апостолом Павлом [колас. глава 1]: благодаряще Бога Отца, призвавшаго вас в причастие наследия святых во свете, иже избави нас от власти темныя, и престави в царство Сына любве своея, о Немже имамы избавление кровию Его, и оставление грехом.

Вопрос. Кто преступает сию заповедь?
Ответ. Первее преступают заповедь сию тии иже не глаголют Бога быти, якоже псалом глаголет [псалом 13; Дамаскин книга 4 глава 3]: рече безумен в сердцы своем, несть Бога. потом преступают и тии, иже много богов быти разумевают, якоже невернии языци. третие преступают тии, иже невидимому врагу предаваются: якоже суть чернокнижники, чаровники: и вси иже волхвующии, и бесом служащии: за теми и вси еретици, иже зле веруют о едином Бозе во Святей Троице [филип. глава 3]: к сему прочее иже болше надежю полагающе на благовременство, на мудрость и учение, на сокровища же и на доброту телесную и други, и на самех себе, неже на Бога.

Вопрос. Како имам разумети о призывании святых на сем месте научи мене?
Ответ. Призывание святых есть во умножение славы истиннаго Бога, тем и не противно есть сей заповеди [Матф. глава 10; Дамаск. книга 4 глава 16; Иоан. глава 16; рим. глава 3]: зане же егда святых молим о ходатайстве к Богу, первее, яко юже они благодать имут от Бога, сподобит и нас причаститися тоя, первее излиания ради честныя крове Христовы, потом и молитвы ради всех святых.

Вопрос. Коея ради вины всех святых на помощь призываем?
Ответ. Первее сего ради [Дамаск. книга 4 глава 16]: понеже мы сами грехов ради наших, не смеем к Богу просто приступати, того ради их предлагаем ходатаев, яко они уже суще в благодати Его непременной помогают нам. второе, понеже они о нас молятся, яко за братию свою. третие, зане, якоже на небесех меншии ангели, чрез болшими приступают к Богу. тако и мы святыми, о милости и о благодати. молящеся, яко чрез болших меншии, и яко чрез ближних далнии, к Богу приступаем [Дамаск. книга 4 глава 16; Дионис. о небесном священнонач. глава 15].

Вопрос. Научи мя от святаго писания о призывании святых.
Ответ. Аще святии о мести на злых человек у Бога просят, якоже во Откровении Иоанна Богослова имам свидетельство сице глаголющо [Апок. глава 6; Дамаск. книга 4 глава 17; Мол. о погребеных], и возопиша гласом великим, глаголюще, доколе Владыко Святыи и истинныи не судиши, и не мстиши крови нашя от живущих на земли, множае паче ходатайства их ради и молитвы к Богу приводим за себе.

Вопрос. Еда святии ведают о молитве и недостатках наших?
Ответ. Души святых от мира сего отшедшыя по естеству своему, аще где немощей наших и неведают: но обаче данною им от Бога благодатию, еюже и ангелом суть подобни, ведают о всех делех и недостатках наших, и молитвы, и милостыни, и иныя добрыя дела наша пред престол Божии приносят, наипаче же аще в мире сем живуще, и многая препинания имуще, знали и ведали по благодати Божии еже кому что потребно бяше, множае паче ныне в болшей благодати суще и непременней славе, знают недостатки нашя: и о нас Господу Богу яко вернии Его слуги, и ближнии друзи, ходатайствуют: якоже о сем пространнеише в великом Катихизме обрящеши.

Вопрос. Которая есть вторая заповедь?
Ответ. Не сотвори себе кумира, и всякого подобия, еже на небеси горе, и елико на земли низу, и елико в водах и под землею, дася не поклониши им, ни да послужиши им: аз бо есмь Господь Бог твой. Бог ревнив. отдая грехи отец на чада, до третияго и до четвертаго рода, ненавидящим Мене, творя же милость в тысящах любящим Мя, и снабдящим заповеди Моя.

Вопрос. Како имам разумети о сей заповеди?
Ответ. В сей заповеди заповеда Господь Бог, оных кумиров имже погани честь и славу Божию отдавали, не творити: иже быша лестнии и лживии бози, понеже вовремя оно жидове уклонны были ко идолослужению.

Вопрос. Како имам разумети о иконах ихже имеет православная церковь?
Ответ. Образы не суть кумири лестных и лживых богов, но суть воображением Спасителя нашего Iсуса Христа, истиннаго Бога, по восприатому человечю естеству. такоже и пречистыя Девы Богородицы. и всех святых [Дамаск. мол. 1, 2, 3; Нис. мол. 2 слово 2; Васил. слово 18 ко Амфилох. о Св. Дусе; Евсев. книга 1 церковник]. и якоже в ветхом законе херувими иже в храме Господни, не быша запрещены, понеже не быша они противны к воли и славе Божии, сице и образы, яже имеет церковь православная, не суть противны сей заповеди. все бо то яже во евангелии и во иных писаниих святых описано есть, и Божиих избранных слуг, и возлюбленых Его другов, нам к славе Его воображено, яко да добродетели их и благочестие наследовати потщимся.

Вопрос. Како имам разумети о телесех святых и о мощех?
Ответ. Телеса святых при животе их полны благодати и дара Святаго Духа были, тем и по смерти в том же теле их Господь Бог прославляемь и величаемь сыи, великая и неизреченная чюдеса творит [Дамаск. книга 4 глава 16]: дивен бо есть во святых своих [псалом 67]. аще же кто не верует, да идет и познает идеже суть мощи святых. а наипаче невидимыи враг в господствующих познавает, и боится их.

Вопрос. Которая есть третия заповедь?
Ответ. Не приемли имени Господа Бога твоего всуе [Исх 20], не очистит бо Господь прилагающих имя Его туне.

Вопрос. Како имам разумети о сей заповеди?
Ответ. Первое имаши от сея заповеди научитися, не приимати имени Господа Бога твоего всуе: рекше, на ложная прекословия еже бы друга лжею препирати, и на клятвы и неправды: понеже то не без мести Божия над тобою будет. второе не обращати имени Божия на кощуны и смехи [псалом 71], но егда и случится Господа Бога воспомянути, с честию и благоговением, яко Господа и Творца своего воспомяни. потом всякое обещание еже кто Господу Богу обещавает, всячески то исполняти, лучше бо есть не обещати Господу Богу, нежели обещався солгати пред Ним [псалом 75]. к сему не точию той преступает сию заповедь иже кленется, но и той иже не по вине кого к клятве приводит. зде же разуметися имать и о сих, иже на святом крещении обещанную веру православно кафолическую отлагают, мирскаго ради суетия: понеже месть Божия над ними, и над домом их, в мире сем пребывает временно, в будущем же вечно пребывати имать.

Вопрос. Которая есть четвертая заповедь?
Ответ. Помни день суботныи святити его [Исх 20]: шесть дний делай, и сотвориши в них вся дела твоя. а день седмыи субота Господу Богу твоему: да не сотвориши всего дела вонь, ты и сын твой, и дщи твоя, раб твой и раба твоя, вол твой и осля твое, и весь скот твой, и пришлец твой обитаяи у тебе: зане в шестих днех сотвори Господь небо и землю, море и вся яже в них. и почи в день седмыи, сего ради благослови Господь день седмыи, и освяти его.

Вопрос. Чего имам научитися от сея заповеди?
Ответ. Первее научишися сему, яко вся тыя дни в них же Господь Бог, особная благодеяния человеческому роду показа, тако чтитися и воспоминатися достойны суть, яко вся наша прочая забавления оставити, во едином же точию прославлении и благодарении Господа Бога, той день бяше суббота в ветхом законе, образом покоя Божия. в новой же благодати наступил день неделныи, образом искуплениа обновлениа из мертвых воскресениа Сына Божиа, иже ни на едином ином имать быти изнурен, точию во единей славе Божии, и в воспоминании благодеянии Его. тожде имаши разумети и о прочих праздницех Господских, в них же особная благодеяния воспоминаются, а заповеданием церковным празднуемы.

Вопрос. Которая есть пятая заповедь, а первая другия скрижали?
Ответ. Чти отца твоего, и матерь твою, да благо ти будет, и будеши долголетен на земли блазе, юже Господь Бог даст тебе.

Вопрос. Како имам разумети сию заповедь?
Ответ. Та заповедь первая есть межи теми, яже к ближнему сприплетаются. межи же ближними к любви и чести первыми суть родители, тем заповелевает Господь Бог, яко да в пристойной чести и любви онех имеем, понеже по Господе Бозе наиболшее от них благодеяние имеем. к сему под именем родителей заключаются вся благодатели наши, якови суть учители, господие. начальствующии в чинех. и иже яковым любо образом благое нам творящии, по апостола Павла учению [рим. глава 13]: всяка душа властелем предержащим да повинуется: несть бо власть аще не от Бога.

Вопрос. Которая есть шестая заповедь?
Ответ. Не убий.

Вопрос. Како имам разумети сию заповедь?
Ответ. Та заповедь заповедует всякого убийства не творити, которое любо есть не по праву. потом всякого соблазна, имже убийство бывает, не точию в теле, но и в души. а егда судии по праву наказание творят, тогда в том греха не имеют, но правде умножение творят.

Вопрос. Которая есть седмая заповедь?
Ответ. Не прелюбодей.

Вопрос. Како имам разумети сию заповедь?
Ответ. Та заповедь научает, дабы человеци от прелюбодеяниа соблюдалися: а Христос еще и совершеннее заповеда, и зрением с похотию не прелюбодействовати. другое же прелюбодейство есть душевное, имже согрешают иже от веры отступают православно соборныя восточныя. такоже и тии прелюбодействуют иже обещавшеся Господу Богу в законе иноческом жити в чистоте, убожестве, и послушании, егда то обещание свое преступают.

Вопрос. Которая есть осмая заповедь?
Ответ. Не укради.

Вопрос. Чего имам научитися в сей заповеди?
Ответ. Научишися ни единыя вещи чюжия привлачити си, яковым любо образом, аще в тай или яве, или убо прелестию яковою ближняго, в чинех же и службах: понеже то все заповедано есть от Господа в сей заповеди. якоже и святыи апостол Павел о сем ясно воображает сице, глаголя [1 кор. глава 6]: не льстите себе, ни блудницы, ни идолослужители, ни прелюбодее, ни сквернителе, ни малакия, ни мужеложницы, ни лихоимци. ни татие, ни пианици, ни досадители. ни хищници, царствия Божия не наследят. зде же имут разуметися и резоимци [лихвяри].

Вопрос. Которая есть девятая заповедь?
Ответ. Не послушествуй на друга своего свидетельства ложна.

Вопрос. Чего имам научитися от сея заповеди?
Ответ. Свидетельства ни на когоже умышленнаго должни есмы глаголати, то бо все противно есть Богу и ближнему: такоже не должни есмы и на злейшаго врага нашего в судех свидетелства ложнаго приимати, или издавати. понеже не должни есмы творити злаго въместо добраго.

Вопрос. Которая есть десятая заповедь?
Ответ. Не вожделееши жены ближняго своего. не вожделееши дому ближняго своего: ни села его, ни отрока его, ни отроковицы его ни вола его, ни осляте его, ни всякого скота его, ниже елика суть ближняго твоего.

Вопрос. Како имам разумети сию заповедь?
Ответ. Та заповедь есть совершеннейшая, юже и Христос предложи, егда не точию в самом деле, но и от мысли искореняя заповеда, ни единей вещи ближняго не пожелати. и аще кто сице сохранит воистину таковыи с ближним в любви живет. в будущем же веце со всеми святыми царство небесное получит; аминь.